इटहरी । जनयुद्धका सहिद परिवार, घाइते तथा वेपत्ता योद्धाप्रति सम्मान प्रकट गर्दै अखिल नेपाल महिला संघ (क्रान्तिकारी) सुनसरी जिल्ला समिति र इटहरी नगर समितिको संयुक्त आयोजनामा तीज विशेष सांस्कृतिक कार्यक्रम भव्य रूपमा सम्पन्न भएको छ ।
मंगलबार सम्पन्न उक्त कार्यक्रममा कोशी प्रदेश सांसद सपना परियार, पूर्व कृषि राज्यमन्त्री रामकुमारी चौधरी र कोशी प्रदेशकी पूर्व उपसभामुख सरस्वती पोखरेलको विशेष उपस्थिति रहेको थियो । कार्यक्रममा तीज पर्वको सांस्कृतिक र सामाजिक महत्व झल्काउँदै विविध नृत्य, गीत तथा सिर्जनात्मक प्रस्तुतीहरू प्रस्तुत गरिएका थिए ।
कार्यक्रमको विशेष क्षणमा जनयुद्धका सहिद रमेश शिवाकी दिदी शोभा सिवा, वेपत्ता योद्धा दिनेश चौधरीकी श्रीमती भुट्टीदेवी चौधरी र घाइते योद्धा संचिता बराइलीलाई दोसल्ला ओढाएर सम्मान गरियो । उनीहरूप्रति गरिएको सम्मानले सहभागिहरूलाई भावुक बनाएको थियो ।
नृत्य प्रतियोगितामा सहभागी कलाकारहरूद्वारा उत्कृष्ट प्रस्तुती दिइएकामा, विजयीहरूलाई पुरस्कार वितरणसमेत गरिएको थियो । कार्यक्रममा सहभागिता जनाउने तथा सफल बनाउन सहयोग गर्ने सम्पूर्णप्रति आयोजकहरूले आभार प्रकट गरेका छन् ।
यो कार्यक्रमलाई व्यवस्था परिवर्तन र जनयुद्धमा योगदान दिएका परिवारप्रति सम्मान प्रकट गर्ने एउटा सकारात्मक पहलका रूपमा महिला नेतृहरुले अर्थ लगाएका छन् ।
