अच्युत भट्टराई
बराहक्षेत्र । सुनसरीको वराहक्षेत्र नगरपालिका वडा नम्बर ४ मा आर्थिक बर्ष २०७६–०७७ मा पूर्वाघार तर्फ ५ करोड ९० लाखका कामहरु भएका छन् । वडा अध्यक्ष आशाराम चौधरीले यी योजना नगर र प्रदेश बाट परेका ठुला योजना भएको बताए । ५० हजार १ लाखका काम धेरै भएका छन् उनले थपे ।
उनका अनुसार पुलाहा खोला नियन्त्रणमा ४० लाख पिडारी ढल निर्माणमा २० लाख धनपुरी ढल निर्माणमा कल्भर्ट सहित २२ लाख ५० हजार, धनपुरी पिच १ करोड २५ लाखमा बोलपत्र आव्हान, पिडारी पिच, २ करोड ३८ लाखमा बोलपत्र आवहान, सर्दु खोला नियन्त्रणमा ३५ लाख, आन्द्रा मोठ ड्रेन निर्माणमा मन्दिर सहित १२ लाख, वडा कार्यालय घेराबारा १४ लाख, स्वास्थ्य चौकी भवन निर्माण ३४ लाख, दश बिगे खोला नियन्त्रण १० लाख, पुलाहा ढल निर्माण २० लाख र थप सर्दु खोला नियन्त्रण २० लाखका काम भएका हुन् ।
अध्यक्ष चौधरीले बिकासका हिसाबले पछि परेको यस वडामा अझै धेरै बाटा घाटा, ड्रेन, कल्भर्टहरुका काम, गर्न बाकी रहेको बताए । उनले भने–‘यहाँ खाने पानी पनि छैन त्यसको पनि प्रयास गरिरहेको छु ।’ अन्य धेरै क्षेत्रमा लागि परेर काम गर्नु पर्ने अवस्था रहेको उनको भनाइ छ ।
लामो समय प्रबासमा बसेर आएका बराहक्षेत्र–४ का राधेसिंह दनुवार भन्छन्–‘अहिले बिकासको चरण हेर्दा पुरै रुप बदलिएको छ, गाउ चिनिनसक्नु भएको रहेछ ।’ संघीयताले गाउँ घर राम्रो हुने रहेछ भन्ने दनुवारको अनुभव रहेको छ ।
