इटहरी । आयोजक राष्ट्रिय जागृति क्लब १४ औँ संस्करणको अन्तर्राष्ट्रिय आमन्त्रण कन्ट्रोल इटहरी गोल्डकपको अन्तिम चारमा पुग्न सफल भएको छ । इटहरी रंगशालामा आइतबार राति सम्पन्न दोस्रो क्वाटरफाइनल खेलमा आयोजकले पाहुना टोली कञ्चनजङ्घा फुटबल क्लब भारतलाई पेनाल्टी सुटआउटमा ५–४ गोल अन्तरले पराजित गर्दै सेमिफाइनलमा स्थान सुरक्षित गर्न सफल भएको छ । निर्धारित ९० मिनेटको खेलमा दुबै टिमले १–१ गोलको बराबरी खेलेपछि खेलको निर्णय सिधै पेनाल्टी सुटआउटबाट लिइएको हो ।
पेनाल्टीमा एरिन तामाङ्गको प्रहार बाहिरिएपछि कञ्चनजंगा क्वाटरफाइनलमै घर फर्कन बाध्य भयो । उसका चार जना खेलाडी अभिषेक लामा, निवाङ तामाङ, पुजन सुब्बा र सरोनको प्रहार मात्र गोलमा परिणत भएको थियो ।
आयोजकको तर्फबाट पांचै जनाले गोल गरे । योगेन्द्र कार्की, प्रवेश दनुवार, बिशाल भण्डारी, उमेश कार्की र अन्तिम पेनाल्टी प्रहार गर्न आएका बिदेशी खेलाडी नेपोलिनको प्रहारले सिधै जाली चुमेपछि आयोजकको जित निश्चित भएको हो ।
त्यसअघि निर्धारित समयको १३ औं मिनेटमा एरिन तामाङको पासमा पुजन सुब्बाले गोल गर्दै कञ्चनजंगालाई अग्रता दिलाएका थिए । तर उसको अग्रता ८६ औं मिनेटमा आयोजकका नेपोलिनले गोल गरेपछि खेल १–१ को बराबरीमा आएको थियो ।
