राजन केडी
इटहरी । दुग्ध उत्पादक सहकारी संस्था लि. इटहरीमा आबद्ध किसानहरुले दुधमा अनुदान पाएका छन् ।
कोसी प्रदेश सरकारबाट दुध लिटरका आधारमा प्राप्त अनुदान वितरण कार्यक्रम अन्तर्गत भेटनरी अस्पताल तथा पशु विज्ञ केन्द्र इनरुवा सुनसरी मार्फत किसानले सहुलियत पाएको दुग्ध उत्पादक सहकारी संस्था लि.ले जनाएको छ ।
दुग्ध उत्पादक सहकारी संस्था लि. इटहरीका व्यवस्थापक धु्रव कोइरालाले दिएको जानकारीअनुसार प्रतिलिटर दूई रुपैयाँका दरले किसानहरुलाई अनुदान दिइएको हो । किसानहरुले २०७९ साउन महिना देखि २०८० बैसाख महिना सम्म १० महिनामा सहकारीलाई उपलब्ध गराएको दुधका आधारमा अनुदान प्राप्त गरेका हुन् ।
दुग्ध उत्पादक किसानलाई आव २०७९–८० मा छुट्याइएको बजेटबाट सो रकम उपलब्ध गराएको छ । सहकारीका अध्यक्ष खेमनाथ काप्mलेका अनुसार शनिवार २ सय ४७ किसानलाई ७ लाख ६ हजार रुपैयाँ अनुदान उपलब्ध गराएको हो ।
अनुदान रकम वितरण कार्यक्रम संस्थाका अध्यक्ष खेमनाथ काप्mलेको अध्यक्षतामा र भेटरीनरी अस्पताल तथा पशु विज्ञकेन्द्र इनरुवा सुनसरीका प्रमुख कुमारसिंह खत्रीको प्रमुख आतिथ्यतामा सम्पन्न भएको थियो । सो कार्यक्रममा इटहरी उपमहानगर पालिका वडा नं. ६ का वडाध्यक्ष दिवस पोखरेल, वडा नं. ९ का वडाध्यक्ष जीतेन्द्र थापा, वडा नं. १० का वडाध्यक्ष अबधेश चौधरी लगायतको उपस्थिति रहेको थियो ।
दुध लिटरका आधारमा सुन्दरहरैंचा–४ का रुद्रप्रसाद अधिकारीले १६ हजार ५ सय ७२ लिटरको अनुदान वापत ३३ हजार १ सय ४४ रुपैया अनुदान पाएका छन् । त्यसैगरि सुन्दरहरैचा–४ कै संगिता पौडेलले १४ हजार ५ सय ७८ लिटर दुध सहकारीलाई उपलब्ध गराएकोमा २९ हजार १ सय ५६ रुपैया पाएकी छन् ।
यस सहकारीले विभिन्न निकायमा पहल गरेर विगत वर्षहरु देखिनै यसरी पशुपालक किसानहरुलाई दुधमा अनुदान रकम उपलब्ध गराउँदै आएको छ ।
