पोखरा । एकताबद्ध देश, खेलकुदको सन्देश भन्ने नारासहित गण्डकी प्रदेशमा आयोजना हुने नवौं राष्ट्रिय खेलकुद प्रतियोगिताको लोगो र मस्कट सार्वजनिक गरिएको छ । राष्ट्रिय खेलकुद परिषद (राखेप) ले शनिबार एक कार्यक्रमकाबीच युवा तथा खेलकुद मन्त्रि महेश्वर गहतराज र राखेपका सदस्यसचिब टंकलाल घिसिङले लोगो र मस्कट सार्वजनिक गरेका हुन् । लोगोमा गण्डकी प्रदेशको राजधानी पोखरा र माछापुच्छ्रे हिमाललाई संकेत गरिएकोछ । साथै, मस्कटमा यस प्रदेशमा पाइने लोपोन्मुख अनि संरक्षित जनावर कस्तुरी मृगलाई देखाएइएको छ ।
लोगो र मस्कट सार्वजनिक गरिएसँगै नारा पनि सार्वजनिक गरिएको छ । लोगो र मस्कट भोलानाथ पौडेलले डिजाइन गरेका थिए । लोगो र मस्कट खुल्ला खुल्ला प्रतिस्पर्धाबाट छनोट गरिएको बताइएको छ । नवौं राष्ट्रिय खेलकुद प्रतियोगिता जेठ २२ देखि २८ गतेसम्म सञ्चालन गरिनेछ । नवौं राष्ट्रिय खेलकुदमा ३६ खेलमा प्रतिस्पर्धा हुनेछ ।
