इटहरी । बिभागीय टिम त्रिभुवन आर्मी क्लबले बाह्रौ संस्करणको अन्तर्राष्ट्रिय आमन्त्रण इटहरी गोल्डकप फुटबल प्रतियोगितामा बिजयी सुरुवात गरेको छ ।
सुनसरीको इटहरी रंगशालामा भएको उद्घाटन खेलमा आयोजक राष्ट्रिय जागृती क्लबलाई २–१ गोल अन्तरले पराजित गर्दै आर्मीले बिजयी सुरुवात गरेको हो । आर्मीका लागि टेकबहादुर बुढाथोकी र भरत खवासले गोल गरे बुढाथोकीले २९ औं मिनेटमा र खवासले ४० औ मिनेटमा गोल गरे । आयोजकका तर्फबाट बिजय भुजेलले ६९ औं मिनेटमा १ गोल फर्काए ।
खेलको म्यानअफ द म्याच आर्मीका भरत खवास घोषित हुदै नगद १० हजार हात पारे । आज आइतबारको खेल ए डिभिजन क्लब मनाङ मस्र्याङ्दी र कञ्चनजंगा फुटबल क्लब भारत बिच हुनेछ । चैत्र २६ गतेसम्म चल्ने प्रतियोगितामा दुई बिदेशी सहित ८ टिम सहभागी छन् । कुल ५४ लाख लागत लाग्ने अनुमान गरिएको प्रतियोगिताको बिजेताले ७ लाख पाउनेछन् भने उपबिजेताले ३ लाख ५० हजार पाउनेछ ।
