काठमाडौं । अन्तर्राष्ट्रिय फुटबल महासंघ फिफाले अखिल नेपाल फुटबल संघ एन्फालाई पाँच लाख डलर दिने घोषणा गरेको छ ।
फिफाले आफ्ना सदस्य राष्ट्रलाई दिँदै आएको सहयोग अनुसार यो पटक पाँच लाख डलरका दरले दिने भएको हो । कोरोनाका कारण फुटबल गतिविधि नभएको अवस्थामा आर्थिक रुपमा ठूलो नोक्सानी भएको भन्दै फिफाले सहयोग गर्ने घोषणा गरेको थियो । घोषणा अनुसार उसले अहिले पाँच लाख डलर दिने भएको हो ।
यो रकम छुट्टै शीर्षकमा भन्दा पनि नियमित बजेटमा आउने एन्फाले जनाएको छ। सदस्य राष्ट्रलाई सहयोग गर्ने क्रममा फिफाले स्थापना गरेको कोषबाट झण्डै १५ करोड डलर खर्च गर्ने छ । यो रकमबाट गरिने खर्चको सबै हिसाब किताब राख्नुपर्ने हुन्छ । यतिबेला विश्वमा जस्तै नेपालमा पनि कोरोनाको असर परिरहेको छ । जसका कारण एन्फाले सबै फुटबल गतिविधि बन्द गर्नुपरेको छ ।
