इटहरी । गायक बालकृष्ण कार्की र गायिका गंगा गौतम आचार्यको स्वरमा रहेको पूर्वेली भाकाको नयाँ दोहोरी गीत ‘माया जालैमा’ को म्यूजिक भिडियो शनिबार इटहरीस्थित दुर्गा पार्टी प्यालेसमा सार्वजनिक गरिएको छ ।
म्यूजिक भिडियो सार्वजनिक कार्यक्रममा इटहरीका गीत–संगीतप्रेमीको उल्लेख्य उपस्थिति रहेको थियो । कार्यक्रममा सहभागीहरूले गीत र भिडियोको प्रशंसा गर्दै सफलताको शुभकामना व्यक्त गरेका थिए ।
गीतका शब्द बालकृष्ण कार्कीले संयोजन गरेका हुन् भने संगीत संयोजन राम कार्कीले गरेका छन् । गीतको मिक्सिङ तथा मास्टरिङ राजकुमार बगरले गरेका हुन् ।
गीतको रेकर्डिङ इटहरीस्थित पूर्वाञ्चल डिजिटल रेकर्डिङ स्टुडियो र काठमाडौंस्थित त्रिवेणी डिजिटल रेकर्डिङ स्टुडियोमा गरिएको हो । म्यूजिक भिडियोको छायाङ्कन तथा दृश्य निर्माण सुमन योन्जनले गरेका छन् ।
‘माया जालैमा’ गीतमा बालकृष्ण कार्की र गंगा गौतम आचार्यबीच पूर्वेली भाकाको मिठासले भरिएको दोहोरी प्रस्तुत गरिएको छ । गीत र म्यूजिक भिडियोले दर्शक तथा श्रोताको राम्रो साथ पाउने अपेक्षा गरिएको छ ।
