इटहरी । संखुवासभा जिल्ला पुर्खौली थलो भएका देशका विभिन्न क्षेत्रमा सक्रिय रहेका लेखक, कलाकार तथा स्रष्टाहरूको साझा संस्था संखुवासभा कलाकार चौतारीको कोशी प्रदेश शाखा गठन गरिएको छ । इटहरीमा सम्पन्न भेलाले ११ सदस्यीय प्रदेश समिति गठन गर्दै कला, साहित्य र संस्कृतिको संरक्षण तथा प्रवद्र्धनका लागि सक्रिय रूपमा काम गर्ने प्रतिबद्धता व्यक्त गरेको छ ।
कार्यक्रममा चौतारीका केन्द्रीय सहसचिव राजु बराकोटी प्रमुख अतिथिका रूपमा सहभागी थिए भने वरिष्ठ कवि बम देवान विशिष्ट अतिथिका रूपमा उपस्थित थिए । कार्यक्रममा प्रदीपकुमार श्रेष्ठ, मुक्ति पोखरेल, हरिबहादुर खत्री तथा चर्चित गायिका जुनु प्रसाईं लगायतको आतिथ्यता रहेको थियो ।
भेलाको अध्यक्षता भोलामान गुरुङले गरेका थिए भने कार्यक्रमको सञ्चालन सुधिर केसीले गरेका थिए।
भेलाले भोलामान गुरुङ (इनरुवा, सुनसरी) को अध्यक्षतामा पछि २ जना थप गर्ने गरि ११ सदस्यीय कोशी प्रदेश समिति गठन गरेको छ । समितिको उपाध्यक्षमा मिश्रा गुरुङ (इटहरी), सचिवमा सुधिर केसी (इटहरी) र कोषाध्यक्षमा सीता थेवे (मोरङ) चयन भएका छन् । सदस्यहरूमा करुणा राई, सुनिता चाम्लिङ, जुनु बुढाथोकी, कृष्ण गौतम, धिरेन गुरुङ र रुपक राई रहेका छन् ।
त्यसैगरी, संस्थाको संरक्षक तथा अभिभावकमा वरिष्ठ कवि बम देवान, मुक्ति पोखरेल र भूपाल नेपाल चयन भएका छन् । सल्लाहकारहरूमा प्रदीपकुमार श्रेष्ठ, इन्द्रजी (झापा), कविता केशरी (मोरङ), विरेश राई (संखुवासभा), शान्तिबहादुर अधिकारी (इटहरी), पुरन राई तथा राजन केडी (इटहरी) रहेका छन् ।
नवगठित प्रदेश शाखाले कला, साहित्य, संगीत तथा सांस्कृतिक प्रस्तुति लगायतका गतिविधिमार्फत समाजमा सिर्जनशील चेतना अभिवृद्धि गर्ने, संखुवासभाको मौलिक पहिचानलाई संरक्षण तथा प्रवद्र्धन गर्ने र विभिन्न क्षेत्रमा रहेका प्रतिभाहरूलाई एकै सूत्रमा आबद्ध गर्ने उद्देश्य लिएको जनाएको छ ।
कार्यक्रममा सहभागी वक्ताहरूले कला र संस्कृतिले समाजलाई जोड्ने महत्वपूर्ण माध्यम भएकाले स्रष्टा र कलाकारहरूको एकता तथा सहकार्य आजको आवश्यकता भएको धारणा व्यक्त गरेका थिए । नवगठित शाखाले कोशी प्रदेशभर सांस्कृतिक तथा साहित्यिक गतिविधि विस्तार गर्दै संस्थालाई अझ प्रभावकारी बनाउने विश्वास व्यक्त गरिएको छ ।
