इटहरी । शिक्षासंगै सामाजिक तथा मानवीय कार्यमा सक्रिय रहँदै आएको इटहरी–४ स्थित विश्व आदर्श कलेजले रक्तदान कार्यक्रम सम्पन्न गरेको छ ।
कलेज अन्तर्गतको स्टुडेन्ट क्वालिटी सर्कलको आयोजनामा सम्पन्न कार्यक्रममा ७६ पिन्ट रगत संकलन गरिएको आयोजकले जनाएको छ ।
सामाजिक उत्तरदायित्व तथा मानवीय सेवाको भावना विकास गर्ने उद्देश्यले आयोजना गरिएको कार्यक्रममा शिक्षक, शिक्षिका, विद्यार्थी तथा अभिभावकहरूको उत्साहजनक सहभागिता रहेको थियो । कार्यक्रममा सहभागीहरूले स्वेच्छिक रूपमा रक्तदान गर्दै मानव सेवामा योगदान दिएका थिए ।
सामाजिक क्लबकी अध्यक्ष अनिशा पाठकको अध्यक्षता तथा नेपाल रेडक्रस सोसाइटी इटहरी शाखाका सभापति दिनेश भट्टराईको प्रमुख आतिथ्यतामा कार्यक्रम सम्पन्न भएको हो ।
कार्यक्रममा बोल्दै प्रमुख अतिथि रेडक्रका सभापती भट्टराईले शरीरमा खेर जाने रगत दान गर्दा कसैको अमूल्य जीवन बचाउन सकिने भएकाले रक्तदान सबैभन्दा ठूलो मानवसेवा भएको बताए । उनले पछिल्लो समय रगतको अभावका कारण बिरामीहरूले समस्या भोग्नु परेको उल्लेख गर्दै युवाहरूलाई नियमित रूपमा रक्तदान गर्न आग्रह गरे ।
भट्टराईले इटहरीमा व्यवस्थित रगत संकलन केन्द्र नहुँदा संकलित रगत धरान पठाउनुपर्ने अवस्था रहेको जानकारी दिँदै स्थानीय सरकारसँग समन्वय गरी इटहरीमै रक्तसञ्चार केन्द्र स्थापना गर्ने पहल भइरहेको बताए ।
त्यसैगरी कलेजका अध्यक्ष लेखनाथ घिमिरेले शिक्षा मात्रै नभई समाजप्रति उत्तरदायी बन्न सिकाउनु पनि शैक्षिक संस्थाको दायित्व भएको बताए । उनले कलेजले विगतदेखि नै रक्तदान लगायत विभिन्न सामाजिक कार्यक्रम सञ्चालन गर्दै आएको उल्लेख गरे ।
कलेजका प्राचार्य गणेश दुलालले वर्षमा दुई पटक सामाजिक सर्कलमार्फत रक्तदान कार्यक्रम आयोजना गर्दै आएको जानकारी दिँदै यस्ता कार्यक्रमले विद्यार्थीहरूमा सामाजिक चेतना, नेतृत्व क्षमता र सेवाभाव विकास गर्न सहयोग पुग्ने बताए ।
कार्यक्रम समापन गर्दै क्लबकी अध्यक्ष अनिशा पाठकले संकलित रगतले धेरै बिरामीलाई नयाँ जीवन दिने विश्वास व्यक्त गरिन् ।
नेपाल रेडक्रस सोसाइटी रक्तसञ्चार केन्द्र धरानको प्राविधिक सहयोगमा कार्यक्रम सञ्चालन गरिएको कार्यक्रममा सह–प्राचार्य रितेश चौधरी, भाइस प्रिन्सिपल मोहन प्रसाद निरौला लगायत शिक्षक, विद्यार्थी र अभिभावकहरूको सहभागिता रहेको थियो ।
