इटहरी । माध्यमिक शिक्षा परीक्षा (एसइई) मा उत्कृष्ट सफलता हासिल गर्दै ४ जीपीए ल्याएकी नेपाल दयानन्द वैदिक मिसन ग्लोबल एकेडेमी (डीभीएम) की छात्रा शिखा लकान्द्रीलाई विद्यालयले विशेष सम्मान गरेको छ ।
विद्यालय परिसरमा आयोजित सम्मान कार्यक्रममा शिखालाई भव्य स्वागत गर्दै उच्च शिक्षाको आगामी यात्राका लागि शुभकामना व्यक्त गरिएको थियो । सो अवसरमा विद्यालयले उनलाई नगद ७ हजार रुपैयाँसहित सम्मान गरेको जनाएको छ ।
कक्षा ३ देखि डीभीएममा अध्ययनरत शिखाले आफ्नो सफलता निरन्तर मेहनत, अनुशासन र विद्यालयले प्रदान गरेको उत्कृष्ट शैक्षिक वातावरणको परिणाम भएको बताएकी थिइन् । विद्यालय प्रशासनले उनको उपलब्धिलाई विद्यालयकै गौरवका रूपमा लिएको जनाएको छ ।
कार्यक्रममा विद्यालयका प्राचार्य डा. बेणुप्रसाद सिटौलाले डीभीएमले सुरुदेखि नै गुणस्तरीय शिक्षा, अनुशासित वातावरण तथा व्यवहारिक सिकाइलाई प्राथमिकतामा राख्दै आएको उल्लेख गरे । उनले आगामी दिनमा पनि उत्कृष्ट शैक्षिक नतिजालाई निरन्तरता दिने प्रतिबद्धता व्यक्त गर्दै विद्यार्थीको क्षमता पहिचान गरी उनीहरूको सर्वाङ्गीण विकासका लागि विद्यालय निरन्तर सक्रिय रहने बताए ।
उनले मेहनती शिक्षक, अभिभावकको साथ र विद्यार्थीहरूको लगनशीलताकै परिणामस्वरूप विद्यालयले उत्कृष्ट नतिजा हासिल गर्न सफल भएको धारणा राखे ।
यस वर्ष डीभीएमबाट ४६ जना विद्यार्थी एसइई परीक्षामा सहभागी भएका थिए । तीमध्ये ३ जनाले ३.९५ जीपीए प्राप्त गरेका छन् भने ३२ जनाले ३.६० जीपीएसहित उत्कृष्ट नतिजा हासिल गरेको विद्यालयले जनाएको छ । अन्य विद्यार्थीहरूले पनि सन्तोषजनक नतिजा ल्याएको विद्यालयको भनाइ छ ।
विद्यार्थीकी अभिभावक रिता लकान्द्रीले विद्यालयको गुणस्तरीय शिक्षण, अनुशासित वातावरण र शिक्षकहरूको निरन्तर मेहनतका कारण आफ्नी छोरीले उल्लेखनीय सफलता हासिल गर्न सकेको बताइन् । उनले विद्यार्थीको क्षमता विकासमा डीभीएमले महत्वपूर्ण भूमिका खेलेको धारणा व्यक्त गरिन् ।
कार्यक्रममा विद्यालय व्यवस्थापन समितिका अध्यक्ष ध्रुवकुमार सुब्बालगायत वक्ताहरूले विद्यार्थीहरूको सफलताले विद्यालयको शैक्षिक स्तरलाई अझ उचाइमा पुर्याएको बताएका थिए ।
