धरान । वी.पी. कोइराला स्वास्थ्य विज्ञान प्रतिष्ठानले आगामी जेठ ८ गतेदेखि साताको दुई दिन सार्वजनिक बिदा लागू गर्ने भएको छ । प्रतिष्ठानले सोमबार जारी गरेको विज्ञप्तिमार्फत नेपाल सरकारको निर्णयअनुसार शनिबार र आइतबार बिदा दिने व्यवस्था कार्यान्वयनमा ल्याइने जानकारी दिएको हो ।
नेपाल सरकार मन्त्रिपरिषद्को निर्णयअनुसार २०८२ चैत २२ गते राजपत्रमा प्रकाशित सूचनाको आधारमा स्वास्थ्य तथा जनसङ्ख्या मन्त्रालयले परिपत्र गरेपछि प्रतिष्ठानले पनि सोही व्यवस्था लागू गर्ने निर्णय गरेको जनाएको छ ।
प्रतिष्ठानका अनुसार अब हरेक शनिबार र आइतबार अस्पतालतर्फका अन्तरङ्ग (इनडोर) सेवा र आकस्मिक सेवा भने नियमित रूपमा सञ्चालन हुनेछन् । तर बहिरङ्ग (ओपीडी) सेवा, प्रशासनिक कार्यालय तथा शैक्षिक गतिविधिहरू ती दुई दिन बन्द रहनेछन् ।
यसअघि शुक्रबार आधा दिन मात्रै सञ्चालन हुँदै आएका अस्पतालका सेवा तथा कार्यालयहरू भने अब अन्य दिनसरह पूर्ण समय सञ्चालन हुने प्रतिष्ठानले स्पष्ट पारेको छ ।
प्रतिष्ठानका प्रवक्ता प्रा.डा. शमशेर श्रेष्ठद्वारा जारी विज्ञप्तिमा सेवाग्राही तथा सरोकारवालालाई नयाँ व्यवस्था अनुसार सेवा लिन आग्रह गरिएको छ ।
