इटहरी । देस तथा विदेशमा छरिएर बसोबास गरिरहेका खोटाङ बजिमय दाजुभाइ तथा बन्धुहरूलाई एकीकृत गर्ने उद्देश्यसहित स्थापना गरिएको ‘खोटाङ बजिमय समाज’ ले संगठन विस्तार र बन्धुहरूबीच एकता मजबुत बनाउने अभियानलाई तीव्रता दिएको छ ।
बन्धुहरूको बंशावली तयार गर्ने, सांस्कृतिक, शैक्षिक तथा आर्थिक अभिवृद्धि गर्ने र व्यवस्थित रूपमा कुलपूजा सञ्चालन गर्ने लक्ष्यका साथ वि.सं. २०६८ सालमा समाजसेवी स्व. टेकमान श्रेष्ठको अगुवाइमा इटहरीमा बन्धु भेला आयोजना गरिएको थियो । सो भेलाले रामधुनी–३, झुम्का क्षेत्रमा मन्दिर निर्माण गर्दै यस अभियानको औपचारिक सुरुवात गरेको थियो ।
उक्त पवित्र कार्यलाई निरन्तरता दिन तथा बन्धुहरूलाई संगठित रूपमा अघि बढाउन स्व. टेकमान श्रेष्ठको सम्मान र स्मृतिमा पुनः दाजुभाइहरूको भेला आयोजना गरियो । त्यसै क्रममा इन्द्रकुमार श्रेष्ठ, खड्ग बहादुर श्रेष्ठ, लालबहादुर श्रेष्ठ, केदार श्रेष्ठ र रोशन श्रेष्ठलगायतको नेतृत्वमा खोटाङ बजिमय समाज संस्था दर्ता गरिएको हो ।
संस्थाको प्रथम साधारण सभा यही चैत १४ गते शनिबार रामधुनी, झुम्कामा सम्पन्न भएको छ । सभामा इन्द्रकुमार श्रेष्ठको सभापतित्व तथा अग्रज व्यक्तित्व नन्दलाल श्रेष्ठको प्रमुख आतिथ्यमा बन्धुहरू व्यापक रूपमा सहभागी भएका थिए । सभाबाट इन्द्रकुमार श्रेष्ठको अध्यक्षतामा १५ सदस्यीय कार्यसमिति चयन गरिएको छ, जसमा वरिष्ठ उपाध्यक्ष खड्गबहादुर श्रेष्ठ, उपाध्यक्ष लालबहादुर श्रेष्ठ, महिला उपाध्यक्ष शृष्टि श्रेष्ठ र महासचिव रोशन श्रेष्ठ रहेका छन् ।
हालसम्म समाजमा १ सय १० भन्दा बढी बजिमय घरपरिवार आबद्ध भइसकेका छन् भने नयाँ सदस्यहरू जोडिने क्रम जारी रहेको छ । संस्थाले बन्धुहरूबीच आपसी सहयोग, एकता र सहकार्य अभिवृद्धि गर्दै सामाजिक, सांस्कृतिक, शैक्षिक तथा आर्थिक विकासमा योगदान पुर्याउने लक्ष्य लिएको छ ।
साथै, जेहेन्दार विद्यार्थीहरूलाई सहयोग पुर्याउन अक्षयकोष स्थापना गर्ने, नेवार बजिमय बन्धुहरूको भाषा, संस्कृति र परम्परा संरक्षणमा प्रेरित गर्ने तथा बंशावली पुस्तक तयार गर्न आवश्यक तथ्यांक संकलन गर्ने कार्यलाई समेत अगाडि बढाइएको महासचिव रोशन श्रेष्ठले जानकारी दिएका छन् । समाजले बन्धुहरूलाई एकताबद्ध बनाउँदै साझा पहिचान र संस्कृतिको संरक्षणमा महत्वपूर्ण भूमिका खेल्ने विश्वास गरिएको छ ।
