फुङलिङ । ताप्लेजुङ्गको फक्तालुङ्ग गाउँपालिकाले शिक्षा सुविधाको व्यापक विस्तार गर्दै पालिकाभित्रका विद्यार्थीहरूका लागि आकर्षक शैक्षिक नीति सार्वजनिक गरेको छ । गाउँपालिकाले उच्च शिक्षा अध्ययन गर्ने सोही पालिकाका विद्यार्थीहरूलाई १०० प्रतिशत छात्रवृत्ति (स्कलरशिप) प्रदान गर्ने निर्णय गरेको हो ।
गाउँपालिका अध्यक्ष राजन लिम्बूका अनुसार प्राविधिक तथा टेक्निकल शिक्षा अध्ययन गर्ने विद्यार्थीहरूलाई ५० प्रतिशतसम्म छात्रवृत्ति उपलब्ध गराइनेछ । यस निर्णयले आर्थिक अभावका कारण उच्च तथा प्राविधिक शिक्षा अध्ययन गर्न नपाएका विद्यार्थीहरूलाई ठूलो राहत मिल्ने अपेक्षा गरिएको छ ।
पालिकाभित्र रहेको पाथीभरा क्याम्पसमा उच्च शिक्षाका लागि पूर्ण स्कलरशिप व्यवस्था गरिएको छ भने भानु माध्यमिक विद्यालयमा निःशुल्क शिक्षा सञ्चालनमा ल्याइएको छ । त्यसैगरी मेदीबुङ्गमा प्राविधिक धार अध्ययन गर्न ५० प्रतिशत शुल्क छुटको व्यवस्था गरिएको छ ।
विशेषगरी सिंवा माध्यमिक विद्यालयमा हाइड्रो इलेक्ट्रिकल इन्जिनीयरिङ्ग अध्ययन पूर्ण रूपमा निःशुल्क सञ्चालन भइरहेको गाउँपालिकाले जनाएको छ ।
शिक्षामा पहुँच बढाउने उद्देश्यले ल्याइएको यस नीतिले फक्तालुङ्ग गाउँपालिकालाई शैक्षिक गन्तव्यका रूपमा विकास गर्ने विश्वास लिइएको छ । पालिकावासी, अभिभावक तथा विद्यार्थीहरू गाउँपालिकाको यो कदमबाट खुसी भएका छन् ।=
