बाबुराम मुडियारी
मोरङ । मोरङको ग्रामथान गाउँपालिका–झोराहाटमा अवस्थित साना किसान सहकारी संस्था लिमिटेडको २७ औँ साधारणसभा शनिबार सम्पन्न भएको छ ।
सभामा प्रस्तुत प्रतिवेदन अनुसार सहकारीले चालु वर्षमा ९६ लाख ८६ हजार १ सय ८४ रुपैयाँ आम्दानी गरेको छ । हाल सहकारी अन्तर्गत १४० समूह सक्रिय छन् भने ५२५ जना सदस्य आवद्ध छन् । सहकारीले समूह बचत, व्यक्तिगत बचत, दैनिक बचतलगायतका विभिन्न बचत योजना सञ्चालन गर्दै आएको छ ।
ऋण सुविधाका क्रममा सहकारीले आफ्ना शेयर सदस्यलाई स्वाबलम्बन कर्जा १० प्रतिशत, पशुपालन कर्जा ७ प्रतिशत, लघु कर्जा १३ प्रतिशत, तरकारी खेती कर्जा ७ प्रतिशत ब्याजदरमा उपलब्ध गराइरहेको जानकारी दिइयो ।
सहकारी संस्था २०३९ सालदेखि झोराहाटमा पाँच रुपैयाँ बचत गर्ने अभियानमार्फत स्थापना भएको र २०४३ सालमा कृषि विकास बैंकको आयोजनामा तथा २०५४ सालदेखि सहकारी संरचनामार्फत औपचारिक रुपमा सञ्चालनमा आएको हो । महिलाको सक्रिय सहभागितालाई विशेष प्राथमिकतासहित सहकारीले निरन्तर आर्थिक गतिविधि विस्तार गर्दै आएको सभामा उल्लेख गरिएको थियो ।
