इटहरी । सुनसरीको इटहरी र मोरङको सुन्दरहरैचाको संगमस्थल, पवित्र वृद्धा गंगा नदी तट यस वर्ष पनि आस्था र भक्ति–भावनाको तरङ्गले भरिपूर्ण बन्यो । सूर्य उपासना, पवित्रताको प्रतीकका रूपमा मनाइने छठ पर्व–यस वर्ष पनि अपार श्रद्धा र उल्लासका साथ मनाइयो । अस्ताउँदो र उदाउँदो सूर्यलाई अर्घ अर्पण गर्दै बुढी गंगा नदीका किनारहरू रंगिन बत्ती र दीपमालाले उज्यालिएका थिए ।
पर्वको अवसरमा छठ पर्व सेवा समितिका अध्यक्ष मनोज कुमार चौधरीको अध्यक्षतामा र राधेश्याम सेवा ट्रष्ट नयाँ बिन्दावन गौशालाका संरक्षक महामण्डलेश्वर दिनबन्धु शास्त्रीको प्रमुख आतिथ्यमा भव्य धार्मिक तथा सांस्कृतिक कार्यक्रम आयोजना गरिएको थियो । उद्घाटन समारोहमा श्रद्धा, भक्ति र सेवा भावको सन्देश दिने विशेष कार्यक्रमहरू प्रस्तुत गरिए ।
समारोहका अवसरमा दिवंगत समाजसेवीहरूको स्मृतिमा स्थापना गरिएका छात्रवृत्तिहरू पनि वितरण गरिए ।
स्व. हीरा महतो स्मृति छात्रवृत्ति पुरस्कार अन्तर्गत निःसहाय बालबालिका सेवा आश्रमका बालबालिकालाई नगद रु. २१,००० प्रदान गरियो ।
स्व. नन्दलाल अग्रवाल स्मृति छात्रवृत्तिबाट भविष्य कर्णलाई रु. ११,००० र स्व. राम नारायण साह स्मृति छात्रवृत्तिबाट युनिसा फुयाललाई रु. ५,१०० प्रदान गरिएको समितिका उपाध्यक्ष बासुदेव कर्णले जानकारी दिए ।
उद्घाटन कार्यक्रममा इटहरी उपमहानगरपालिका–६ का अध्यक्ष दिवस पोखरेल, भगवती दल गणका प्रमुख सेनानी राजन भुजु, कोशी प्रदेशसभा सदस्य मिना श्रेष्ठलगायत अतिथिहरूको उपस्थितिले कार्यक्रमलाई अझ भव्य बनायो ।
वृद्धा गंगाको किनारमा भेला भएका भक्तजनहरूले अस्ताउँदो सूर्यलाई अर्घ दिँदै मनका सम्पूर्ण विकारहरू विसर्जन गर्ने र उदाउँदो सूर्यसँग नवजीवन र समृद्धिको कामना गर्ने परम्परागत संस्कार दोहोर्याए । धुप, दीप, गान–बजन र आरतीको सुगन्धले सम्पूर्ण वातावरण भक्ति–भावनाले ओतप्रोत बन्यो ।
श्रद्धा, शुद्धता र समर्पणको अनोठो संगम बनेको यस छठ महापर्वले इटहरी–सुन्दरहरैचाको सामाजिक, सांस्कृतिक र धार्मिक एकतालाई अझ प्रगाढ बनाएको सहभागीहरूले बताएका छन् ।
