काठमाडौं । पूर्व प्रहरी अतिरिक्त महानिरीक्षक (एआईजी) देवेन्द्र सुवेदीमाथि नेकपा (माओवादी केन्द्र)का संयोजक तथा पूर्वप्रधानमन्त्री पुष्पकमल दाहाल (प्रचण्ड) को सचिवालयले साइबर अपराधमा संलग्न भएको आरोपमा उजुरी दर्ता गरेको छ ।
सामाजिक सञ्जालमार्फत जेनजी आन्दोलन क्रममा निवासमा आगजनी हुनुअघि प्रचण्डले निवासबाट दुई ट्रकमा दुई करोड रुपैयाँ लगेको भनी गरिएको दाबी ‘पूर्णतः झुठो र चरित्रहत्या गर्ने प्रयास’ भएको भन्दै प्रचण्डको सचिवालयले साइबर ब्यूरोमा कानुनी कारबाहीको माग गरेको हो ।
सुवेदीविरुद्ध दर्ता गरिएको उजुरीमा डिजिटल माध्यममार्फत गरिएको गलत प्रचार–प्रसार सूचना प्रविधि ऐन २०६३ को दफा ४७ र सम्बन्धित साइबर अपराधका प्रावधानहरू उल्लङ्घन गरिएको उल्लेख छ ।
कानुनविद्हरूका अनुसार, आरोप प्रमाणित भए सुवेदीलाई पाँच वर्षसम्म कैद वा एक लाख रुपैयाँसम्म जरिवाना, वा दुवै सजाय हुन सक्छ ।
