काठमाडौं । नेपाल कम्युनिस्ट पार्टी (माओवादी केन्द्र) का अध्यक्ष तथा पूर्वप्रधानमन्त्री पुष्पकमल दाहाल (प्रचण्ड) ले जेन–जेड पुस्ताले उठाएका मागहरूप्रति गम्भिरता देखाउँदै ती मागहरूको समाधान संविधानसम्मत र लोकतान्त्रिक प्रक्रियाबाट खोजिनुपर्नेमा जोड दिएका छन् ।
प्रचण्डले राष्ट्रपति रामचन्द्र पौडेलले जारी राखेको संवाद प्रयास तथा सहमति निर्माणको पहलको स्वागत गर्दै त्यसलाई सफल बनाउन सबै पक्ष संवेदनशिल र जिम्मेवार हुनुपर्ने बताएका छन् ।
उनले हालको परिस्थितिमा नेपाली सेना र अन्य सुरक्षा निकायहरूले शान्ति सुरक्षा कायम गर्न खेलेको भूमिकाको समेत प्रशंसा गर्दै यस्तो संवेदनशील घडीमा संयमता, सहिष्णुता र संवादको विधि अँगाल्न सबै पक्षसँग अपिल गरेका छन् ।
‘राष्ट्रपतिबाट भइरहेको पहल तथा शान्ति सुरक्षा कायम गर्दै त्यसमा सहजीकरण गर्न नेपाली सेनालगायत सुरक्षा निकायले खेलिरहेको भूमिकाको म प्रशंसा गर्दछु । सबै पक्षले लोकतान्त्रिक प्रक्रिया र संविधानको मर्यादालाई सम्मान गर्नुपर्छ,’ प्रचण्डको अपिलमा उल्लेख छ ।
यसअघि जेन–जी पुस्ताले भ्रष्टचारको विरुद्ध र सुशासनको पक्षमा विभिन्न मागहरू उठाउँदै आएका छन् । यस्तो अवस्थामा पूर्वप्रधानमन्त्री प्रचण्डको अपिललाई जिम्मेवार नेतृत्वको पहलकदमीको रूपमा बुद्धिजीवीहरुले विश्लेषण गरेका छन् ।
