काठमाडौं । नेपाल कम्युनिष्ट पार्टी (माओवादी केन्द्र) का अध्यक्ष तथा पूर्व प्रधानमन्त्री पुष्पकमल दाहाल (प्रचण्ड) ले जेन–जी आन्दोलनका मागहरूलाई संविधानसंगत र लोकतान्त्रिक प्रक्रिया भित्रै सम्बोधन गर्न सकिने स्पष्ट धारणा व्यक्त गरेका छन् । आज जारी विज्ञप्तिमा प्रचण्डले आन्दोलनका एजेण्डाहरूलाई यथास्थितिवाद र तदर्थवादी शासन प्रणालीको विकल्पमा उन्नत लोकतन्त्रको मागका रूपमा संश्लेषण गरेका छन् ।
प्रचण्डले भनेका छन्, ‘लोकतन्त्रको विकल्प समुन्नत र अझ सुदृढ लोकतन्त्र मात्रै हो । गणतन्त्रको विकल्प अझ सुदृढ गणतन्त्र हो ।’ उनका अनुसार जेन–जी पुस्ताले उठाएका मुद्दा न संविधान विरोधी थिए, न त संसद् विघटनको पक्षमा ।
विज्ञप्तिमा चेतावनी साथ भनिइएको छ कि जनताको बलिदानीबाट प्राप्त उपलब्धिहरूलाई उल्ट्याउने उद्देश्यले आन्दोलनभित्र घुसेका प्रतिगामी तत्वहरू तोडफोड, आगजनी र विध्वंसका कार्यमार्फत आन्दोलनलाई बदनाम गर्न खोजिरहेका छन् । प्रचण्डले यस्ता गतिविधिको कडा आलोचना गर्दै लोकतान्त्रिक आन्दोलन र विध्वंसबीच स्पष्ट भिन्नता गर्नुपर्ने बताए ।
आफू सरकारको प्रधानमन्त्री हुँदा र पार्टी दुवै जेन–जी आन्दोलनप्रति संवेदनशील रहेको जनाउँदै उनले भने, ‘उहाँहरूले उठाएका मागहरू संविधान र वर्तमान संसदीय प्रक्रियाभित्रबाट पूरा हुन सक्छन् भन्नेमा हामी विश्वस्त छौं ।’ तर उनले संविधान र लोकतन्त्रको अवमूल्यन हुने कुनै पनि कार्यलाई सह्य नहुने चेतावनी पनि दिएका छन् ।
