इटहरी । सुनसरीको इटहरी उपमहानगरपालिका कार्यालयमा सुशासन कायम नभएको साथै जनहितविपरीतको क्रियाकलापहरु बढ्दै गएकाले इटहरी क्षेत्रमा क्रियाशिल राजनीतिक दलहरू तथा सरोकारवालाहरू जुटेर इटहरी नगरप्रमुख हेमकर्ण पौडेललाई खबरदारी पत्र बुझाएका छन् ।
सोमबार इटहरी उपमहानगर प्रमुखलाई ६ वटा राजनीतिक दलका अध्यक्ष, संयोजक साथै प्रतिनिधिहरूले संयुक्तरूपमा खबरदारी पत्र बुझाउँदै बजेट पारित नगरेको, सार्वजनिक सुनुवाइ नगरेको, जनविरोधी कर नीति लागू गरेको, वेरुजु रकम उच्च रहेको भन्दै यी सवालमा तत्काल सुधारको माग गरेका छन् । खबरदारी पत्र बुझाउने दलहरूमा नेपाल कम्युनिष्ट (माओवादी केन्द्र), नेकपा एकीकृत समाजवादी, राष्ट्रिय प्रजातन्त्र पार्टी, संघीय लोकतान्त्रिक राष्ट्रिय मंच (संघीय लिम्बुवान प्रान्तीय नेपाल), र संयुक्त पहिचानवादी मोर्चा इटहरी रहेका छन् । खबरदारी पत्रमा नेकपा (माओवादी केन्द्र इटहरी अध्यक्ष–राजकुमार आचार्य, राष्ट्रिय प्रजातन्त्र पार्टी इटहरी अध्यक्ष–आकाश हाङ सुब्बा, नेकपा एकीकृत समाजवादी इटहरी संयोजक–गौरीमान परियार, ने.क.पा. इटहरी सचिव–नन्दु सी, संयुक्त पहिचानवादी मोर्चा इटहरी संयोजक – राजेन्द्र दाहाल, संघीय लोकतान्त्रिक राष्ट्रिय मंच नेपाल इटहरी (संघिय लिम्बूवान प्रान्तीय नेपाल) अध्यक्ष – भिमकुमार लिम्बू रहेका छन् ।
स्थानीय सरकार सञ्चालन ऐन र संविधानको मर्मअनुसार जिम्मेवार तथा जवाफदेही शासन प्रणाली स्थापित गर्नु अत्यावश्यक रहेकोमा इटहरी उपमहानगरपालिका कार्यालयमा त्यसको विपरित काम भएको भन्दै ६ राजनीतिक दलहरूले तत्काल सुधार गरि सुशासन कायम गर्न चेतावनी दिएका छन् । यस्ता कुशासनका गतिविधिहरू दोहोरिए शान्तिपूर्ण तरिकाबाट चरणबद्ध आन्दोलन गर्ने खबरदारी पत्रमा हस्ताक्षरकर्ता ६ राजनीतिक दलहरुले बताएका छन् ।
