इटहरी । कस्यप गोत्रीय अधिकारी बंसज प्रतिष्ठानको सातौं वार्षिकोत्सव र जिल्ला अधिवेशन आयोजना गरेको छ । उक्त कार्यक्रममा प्रतिष्ठानका केन्द्रीय अध्यक्ष नरेन्द्रकुमार अधिकारी, प्रमुख अतिथी, र अन्य विशिष्ट अतिथिहरूको उपस्थिति रहेको थियो ।
कार्यक्रमको उद्घाटन केन्द्रीय अध्यक्ष नरेन्द्रकुमार अधिकारी र महासचिव चिरञ्जिवी अधिकारीसँगै पूर्व जिल्ला अध्यक्ष प्रदीप अधिकारीको शुभकामना मन्तव्यबाट गरिएको थियो । कार्यक्रमको शुभारम्भ पानसमा बत्ती बालेर गरियो ।
समारोहको एक विशेष आकर्षण भनेको बंशका जेष्ठ नागरिक सम्मान वितरण थियो, जसमा ९० वर्षका इटहरी–२ बेलगाछी निवासी रनबहादुर अधिकारी खत्रीलाई वंशजको जेष्ठ नागरिकको रुपमा सम्मानित गरियो । साथै आमाको सेवकको रुपमा राजेन्द्र अधिकारी खत्री (सुधिर केसी) लाई सम्मान प्रदान गरिएको हो ।
कार्यक्रममा कवि एवम् पत्रकार राजेन्द्र अधिकारी खत्री (सुधिर केसी) ले कविता वाचन गरी सबैलाई साहित्यिक अभिवाद गरे । यस कार्यक्रममा विभिन्न जिल्लाका अध्यक्षहरू, भारतको मणिपुरका अध्यक्ष लगायतका बंशज अगुवाहरुको पनि सहभागिता थियो ।
कार्यक्रमका दौरान सांस्कृतिक कार्यक्रम पनि आयोजना गरिएको थियो, जसमा स्थानिय कलाकारहरूको प्रस्तुति रहेको थियो ।
यस कार्यक्रमबाट नयाँ कार्यसमितीको गठन पनि भएको छ, जसमा अध्यक्ष बीरेन्द्रबहादुर अधिकारी चयन भएका छन् । वरिष्ठ उपाध्यक्ष रविन्द्र अधिकारी, उपाध्यक्ष रमेश अधिकारी र सचिव विवेक अधिकारी लगायतका नयाँ कार्यसमिती सदस्यहरूको घोषणा गरिएको छ ।
यस अवसरमा देशका ७२ जिल्लामा र प्रवाशमा समेत समितिहरूको गठन भइसकेको जानकारी दिइएको थियो । आगामी दिनहरूमा प्रदेश र केन्द्रीय अधिवेशनको आयोजना हुने बताइएको छ ।
यस कार्यक्रममा कस्यप गोत्रीय अधिकारी बंसजको ऐतिहासिकताको चर्चा गरिएको थियो ।
