काठमाडौं । नेकपा माओवादी केन्द्रका उपाध्यक्ष तथा प्रवक्ता अग्नि सापकोटाले नेकपा एमाले र नेपाली कांग्रेसबीच भएको सहमति असंवैधानिक र अप्राकृतिक भएको बताएका छन् ।
पार्टीको प्रचार विभागका ईन्चार्ज समेत रहेका सापकोटाले विभागको बिहीबारको छलफलमा धारणा राख्दै संविधानमा बलियो प्रतिपक्षको कल्पना गरिएको र त्यसको लागि दुई ठूला दल मध्ये एउटा सत्तापक्षमा र अर्को प्रतिपक्षमा रहने कुरा प्राकृतिक हुने बताउँदै अहिले भएको भनिएको गठबन्धन संवैधानिक हुन नसक्ने दावी गरे ।
उनले यो गठबन्धन अलोकतान्त्रिक र सत्तालिप्सामा केन्द्रीत भएको समेत आरोप लगाएका छन् । उनले आफुलाई लोकतान्त्रिक दल दावी गर्ने कांग्रेस र एमालेले मध्यरातमा गरेको भनिएको सहमति चार दिनसम्म सार्वजनिक गर्न नचाहने र आफ्नो बैठकमा समेत नदेखाउने कार्य अलोकतान्त्रिक नै भएको बताए ।
उनले एमाले अध्यक्ष केपी ओेलीले प्रधानमन्त्रीलाई पुरै ढाँटेर झुक्याएको र गम्भिर धोका दिएको बताए । माओवादी अध्यक्ष प्रचण्ड एमालेसहितको वाम एकताको लागि प्रतिवद्व भएको तर एमाले अध्यक्ष ओली माओवादी सक्ने नियोजित षड्यन्त्रमा रहेको पुष्टि भएको उनले बताए ।
उनले प्रधानमन्त्री प्रचण्डले तत्काल राजिनामा नदिने र संवैधानिक अधिकार प्रयोग गर्दै संसदबाट विश्वासको मत फेस गर्ने स्पष्ट पारे । उनले त्यसपछि राष्ट्रपतिले संविधानको धारा ७६ को उपधारा ३ बमोजिम नै सरकार निर्माणको आव्हान गर्नुपर्ने बताए ।
उनले माओवादी प्रतिपक्षमा बसेर जनताको पक्षमा काम गर्न तयार रहेको र आगामी निर्वाचनमा विजय प्राप्त गर्न लाग्ने बताए ।
