काठमाडौं । मानिसलाई ईश्वरीय तत्वसँग साक्षात्कार गराउँदै ‘लय विज्ञान’ आइतबार सम्पन्न भएको छ ।
जीवन विज्ञानको आयोजनामा वैशाख २३ गतेदेखि काठमाडौंको बानेश्वरमा सुरु भएको सात दिवसीय ध्यान साधनामुखी कार्यक्रम आइतबार सकिएको हो ।
कार्यक्रममा सहभागीले आफुले आफैँसँग साक्षात्कार गर्दै आफुभित्रको खुसी भेट्टाउन मद्दत गरेको बताएको छन् । उनीहरूले आफुमा रहेका शारीरिक, मानसिक र भावनात्मक कमजोरीहरू हटाउन र सकारात्मक र ऊर्जाशील जीवन जिउन सहज भएको बताएका छन् ।
जगतप्रसाद लम्सालले ध्यानको माध्यमबाट आफ्नो सङ्कल्प शक्ति बढेको बताउँदै युवाहरूका लागि यो कार्यक्रम उपयोगी रहेको बताउँनुभयो । बोध र लय विज्ञान कार्यक्रम पृथक र जीवन परिवर्तनका लागि आवश्यक रहेको उहाँको भनाइ छ ।
लय विज्ञानले आफु भित्रको खुसी भेट्टाएको बताउँदै सहभागी कल्पना घिमिरेले सत्सङ्ग, साधना र सेवाले मात्र जीवन खुसी, सफल र मुक्त हुने ज्ञान पाएको अनुभव सुनाउनु भयो । पदमराज सुवेदीले लय विज्ञानबाट ध्यानको दिव्य ज्ञान पाएको बताउँदै ध्यानलाई फैलाउन लागि पर्ने बताउँनुभयो ।
सात दिनसम्मको योग र ध्यान साधनामा जीवन विकास विशेषज्ञ श्रद्धेय रमेश नेपाल र एल पि भानु शर्माले योग, ज्ञान र ध्यानका माध्यमबाट सहभागीलाई आफुसँग एकाकार गराई जीवन, जगत र ईश्वरीय तत्वबिचको अन्तरसम्बन्ध स्पष्ट पार्नु भएको थियो । अध्यात्म र मनोविज्ञानका वैज्ञानिक र प्रयोगात्मक सूत्रहरूको प्रयोग गरी सहभागीलाई स्वबोध गर्न र आफुसँग एकाकार बनाउँन अभ्यासहरू गराउनु भएको थियो ।
कार्यक्रममा कर्मचारी, शिक्षक, व्यवासायी, विद्यार्थीलगायत विभिन्न क्षेत्रका व्यक्तिहरू देशका विभिन्न ठाउँ र नेपाल बाहिरका विभिन्न देशबाट चार सयबढी सहभागी थिए् ।
