धरान । नेपाल कम्युनिष्ट पार्टी संयुक्त जिल्ला समिति सुनसरीले वर्तमान राष्ट्रिय परिस्थिति र नेपाली विशेषताको समाजवाद विषयक अन्तरक्रिया कार्यक्रम आयोजना गरेको छ ।
धरानको ड्रिमल्याण्ड होटेलको सेमिनार हलमा आयोजना गरिएको कार्यक्रममा आधार नोट सो पार्टीका सुनसरी जिल्ला इन्चार्ज डिबी सीले प्रस्तुत गरेका थिए । आधार नोटमा उनले उत्पीडित जाति, लिंग, वर्ग, समुदाय क्षेत्रलाई यो दलाल पुँजीवादी संसदीय व्यवस्थाले अधिकार दिन नसक्ने दाबी गरेका छन् । उनले दलाल संसदीय व्यवस्थाविरुद्ध लड्दै नेपाली विशेषताको समाजवादका निम्ति जुट्न अपिल समेत गरेका छन् ।
कार्यक्रममा प्रमुख वक्ता चिरन सी थिए । उनले पुराना दलका नेता इमान्दार नभएकै कारण नेपाली जनताले दुःख पाएको बताए । उनले भने–‘अब हरेक राष्ट्रवादी, परिवर्तनगामी जनताले सोच्नु पर्ने बेला आएको छ ।’ एकले अर्कालाई गाली गरेर मात्र समय व्यतित गर्ने होइन आलोचना छोडेर नेपाली विशेषताको समाजवादमा गोलबन्द हुनुको विकल्प नभएको उनको भनाइ थियो ।
कार्यक्रममा समाजवादी मोर्चाका केन्द्रीय अध्यक्ष गजेन्द्र सी, नेकपा एमालेका प्रतिनिधि पारस काङबाङ, संघीय लोकतान्त्रिक राष्ट्रिय मंचका मोहन प्रसाद तिगेला, नेकपा क्रान्तिकारी माओवादीका प्रतिनिधि पेमा लामा, वामपन्थी नेता भूमि चाम्लिङ्ग र राजनीतिक विश्लेषक राजेन्द्र किरातीलगायतले समाचावादका विषयमा आ–आफ्नो विचार व्यक्त गरेका थिए । कार्यक्रमको संचालन उत्तर सुनसरी सेक्रेटरी सुरेश सिले गरेका थिए भने दक्षिण सुनसरी सेक्रेटरी जीवन सिको अध्यक्षता गरेका थिए ।
