कुमोद अधिकारी
विराटनगर । दादुरा, रुवेला रोग रोकथामका लागि स्वास्थ्य कार्यालय मोरङले जिल्लाभर दादुरा रुवेला खोप अभियान संचालन गर्ने भएको छ । सो रोगका विरामी बढ्न थालेपछि कार्यालयले ६ महिनादेखि १५ वर्ष उमेर समूहका बालबालिकालाई लक्षित गर्दै खोप अभियान संचालन गर्न लागेको हो । कार्यालयले शनिबार विराटनगरमा पत्रकार सम्मेलन गर्दै विराटनगर महानगरपालिका बाहेक १६ वटा पालिकामा साउन –२८ गते देखि ३२ गतेसम्म र विराटनगर महानगरपालिकामा भाद्र–११ गते देखि १५ गतेसम्म अभियान संचालन गर्न लागेको जानकारी गराइयो ।
कार्यालयका प्रमुख डा. सुरेश मेहताले अभियान अन्तर्गत २ लाख ८५ हजार ८सय ७७ जनालाई यो खोप लगाउने लक्ष्य रहेको बताए । त्यसका लागि विद्यालय लक्षित खोप केन्द्र ९ सय १४ गरी १ हजार ७३ खोप केन्द्र संचालनमा ल्याइने छ ।
मोरङ र सुनसरी जिल्लामा दादुरा रुवेलाका बिरामी बढेपछि दुवै जिल्लामा खोप अभियान संचालन गर्न लागिएको कार्यालय प्रमुख डा. मेहताले बताए ।
कार्यक्रममा बोल्दै मोरङ जिल्ला खोप समन्वय समितिका अध्यक्ष एवम् जिल्ला समन्वय समितिका अध्यक्ष अजम्बर राईले खोप अभियानबारेमा सबैमा जानकारी गराउन प्रचार–प्रसार आवश्यक रहेको बताए ।
