इटहरी । सुनसरीको इटहरीमा प्रथम ऐतिहासिक जगन्नाथ रथयात्रा हुने भएको छ । रथयात्रा कार्यक्रमका विषयमा जानकारी गराउन बिहीवार आयोजना गरिएको पत्रकार सम्मेलनमा यही असार ९ गते भगवान जगन्नाथ, वलदेव र शुभद्रा महारानीको रथ यात्रा गरिन लागेको जानकारी गराएको हो ।
पत्रकार सम्मेलनमा रथयात्रा कार्यक्रमका अध्यक्ष विष्णु रिजालले यही असार ९ गते दिउँसो ३ वजे देखि इस्कोन इटहरी सेन्टर हटिया लाइनबाट दिव्य किर्तन, नृत्य सहित रथ यात्रा गरिने जानकारी दिए ।
रथयात्रा पछि राधाकृष्ण शिव मन्दिरमा आएर महा आरती, प्रवचन सहित प्रसाद वितरण गरि कार्यक्रम समापन गरिने इस्कोन इटहरी सेन्टरका प्रमुख प्रचारक ललित माधव दासले पत्रकारहरुलाई जानकारी गराए ।
रथयात्रामा इटहरी तथा आसपासका क्षेत्रका २ हजार देखि ३ हजार जना सम्म भक्तजनहरुको सहभागिता रहने अनुमान गरिएको छ । जगन्नाथ पुरीसँग जोडिने यस प्रकारको रथ यात्रा सुनसरीको इटहरीमा पहिलो पटक आयोजना हुन लागेको समेत जानकारी गराइयो । पछिल्लो समयमा इस्कोन इटहरीले यस क्षेत्रमा विभिन्न धार्मिक गतिविधिहरु गर्दै आएको छ ।