ताप्लेजुङ्ग । ताप्लेजुङ्ग किसान रमेश राईले कन्या र सिताके च्याउ उत्पादन गर्दै आएका छन् ।
ताप्लेजुङ्ग फुङलिङ्ग नगरपालिका वडा नम्बर ७ मा राईले ९ बर्षदेखि काठको मुढाबाट यस्तो च्याउ उत्पादन गर्दै आएका हुन् । बजारमा तत्काल खपत हुन नसकेपनि उनले च्याउ उत्पादन गर्न छाडेका छैनन् । उनले च्याउको सुकुटी बनाएर भएपनि बजारमा पठाउने गरेका छन् । व्यावसाय राम्रो भए पनि थप ब्राण्डिङ र मर्केटिङ्गको समस्या अझै रहेको उनको बुझाइ छ ।
रमेश राई जनयुद्ध कालमा पूर्णकालिन नेताको रुपमा भूमिगत जिवन बिताएका नेता हुन् । उनलाई त्यतिबेला रशिक उपनामले चिनिन्थ्यो । शान्ति प्रक्रिया पछि उनी यो व्यावसायमा लागेका हुन् । राई अखिल नेपाल किसान संघ (क्रान्तिकारी) ताप्लेजुङको अध्यक्ष छन् । राईको मेहनतलाई नजिकबाट नियालिरहेका स्थानीयवासीले सफल किसानको रुपमा उनलाई हेर्ने गरेका छन् । अनुभव, ज्ञान र सिपले निखारिदै गएका राईले गाउँ, घरका युवाहरुलाई स्थानीय स्तरमै केही गरेर जिवन गुजारा चलाउन सकिन्छ भन्ने आशा जगाएका छन् ।
ताप्लेजुङ जिल्लाको अधिकांश वडा, टोलहरुमा सिताकी च्याउ सजिलै उत्पादन गर्न सकिने र त्यसको सुकुटी बनाएर बजार ब्यबस्थापन गर्न सकिने राम्रो सम्भावना भएकाले युवाहरुलाई यस्तो अभियानमा लाग्न उनले आग्रह पनि गरेका छन् ।
मेहनती, सफल किसानहरुलाई सरकारले प्रोत्साहित गर्न आवश्यक रहेको नेकपा (माओवादी केन्द्र)का केन्द्रीय सदस्य पराग क्षेत्रीले बताए ।
