अर्जुन शर्मा
इटहरी । नयाँ वर्षमा आदिवासी समुदायले मनाउने सिरुवा पर्व सुरु भएसँगै इटहरीको थारु जातीय कुल देवता घर मानिने कचना महादेव ग्रामथानमा ३ बैसाखमा ठूलो धार्मिक मेला लागेको छ ।
पूर्वी तराईमा नयाँ बर्षको सुरुवातसंगै तीन दिनसम्म पानी, माटो र रङ खेलेर धुमधामसँग सिरुवा पर्व मनाउने प्रचलन छ । सिरुवा राजवंशी, ताजपुरीया, गनगाईं, थारू, माझी, मेचे, उराव, किसान, धिमाललगायत आदिवासी समुदायको सांस्कृतिक पर्व हो ।
नयाँ वर्ष सुरु भएकै दिनदेखि तीन दिनसम्म यी समुदायले सिरुवा पर्व मनाउने गर्छन् । सिरुवा मनाइने पाँचवटा जिल्लामा सरकारले सार्वजनिक बिदासमेत दिने गरेको छ ।
सिरुवाको अर्थ सुरुवात भएकाले यस्ता मेला बैसाखैभरी एक–एक दिन विभिन्न ग्रामथानमा लाग्नेछ । झापा, मोरङ, सुनसरी, सिरहा र सप्तरीमा सिरुवाका अवसरमा प्रदेश सरकारले बिदा दिने गरेको छ ।
यसैबीच, इटहरी उपमहानगरपालिकाले आज (आइतबार) बैशाख ३ गते सार्वजनिक विदा दिएको छ ।
थारु जातीलाई प्रथम जाती घोषणा गरेको उपमहानगरपालिकाले थारु जातीले मनाउने सिरुवा पर्वको अवसरमा विदा दिएको हो ।
बैशाख महिनाभरी विभिन्न ग्रामथानहरूमा थारु समुदायले पूजा गर्ने र मेला महोत्सव आयोजना गर्ने गरेका छन् । थारु संस्कारलाई संरक्षण र सम्मान गर्दै ३ गते विदा दिइएको मेयर हेमकर्ण पौडेलले हस्ताक्षर गरेका सूचनामा उल्लेख छ ।
