इटहरी । दशैं, तिहार र छैठ सकिए लगत्तै चुनावी सरगर्मी ह्वात्तै बढेको छ । आगामी मंसिर ४ गते हुने प्रतिनिधिसभा तथा प्रदेशसभा निर्वाचन २०७९ को चुनावी सरगर्मी ह्वात्तै बढेको हो ।
यसैक्रममा सुनसरीको ३ नम्बर क्षेत्रबाट बाम लोकतान्त्रिक गठबन्धनको तर्फबाट प्रतिनिधिसभा सदस्यकालागि उमेदवार बनेका विजयकुमार गच्छदारले प्रदेशसभातर्फ उमेदवार बनेकी सरस्वती पोखरेल डाँगीलाई विजयी गराउन कार्यकर्ताहरुलाई आग्रह गरेका छन् । प्रदेशसभा १ सभाकी निवर्तमान उपसभामुख पोखरेल यही क्षेत्रको प्रदेशसभा १ को उमेदवार बनेकी छन् । उनी नेपाल कम्युनिष्ट पार्टी (माओवादी केन्द्र)को तर्फबाट गठबन्धनको उमेदवार बनेकी हुन् । गच्छदार भने नेपाली काँग्रेसका वरिष्ठ नेता एवम् यस क्षेत्रबाट निरन्तर चुनाव जित्दै आएका नेता हुन् ।
गठबन्धनले मंगलबार इटहरी १५ मा आयोजना गरेको संयुक्त कार्यकर्ता भेलालाई सम्बोधन गर्दै गच्छदारले भने ‘मलाई भन्दा बढी भोट दिएर सरस्वतीलाई जिताउनु ।’
गठबन्धन दलको तर्फबाट सुनसरी क्षेत्र नम्बर ३ (१) को निर्वाचन परिचालन समिति दीपक ढकालको संयोजकत्वमा गठन भएको छ । ढकालले संयोजकको जिम्मेवारी पाए सँगै ३ (१) मा सबै वडाको प्रतिनिधित्व हुने गरी १६७७ जनाको निर्वाचन परिचालन समिति पनि घोषणा गरेर गठबन्धन जिताउन मैदानमा उत्रिएका छन् । साथै नेकपा –माओवादी केन्द्र)को तर्फबाट सोही पार्टीका प्रदेश १ उपाध्यक्ष शिवकुमार डाँगीले चुनावी अभियानको नेतृत्व गरिरहेका छन् ।
सुनसरी क्षेत्र नम्बर ३ (१) अन्तरगत १७ वटा वडाहरू पर्छन् । जस अन्तरगत इटहरीको ६ ,७, ८, ९, १०, ११, १२, १३, १४ र १५ नम्बर वडा गरी १० वटा वडाहरू पर्छन् भने दुहबीको २, ३, ४, ८ र ९ नम्बर वडा सहित ५ वटा वडाहरू पर्छन् । गढी गाउँपालिकाको १ नम्बर वडा र इनरुवाको ७ नम्बर वडा यो क्षेत्र अन्तरगत पर्छन् ।
