बराहक्षेत्र नगरपालिकाद्वारा किसानलाई कृषि औजार वितरण
साउन २९, २०७९ / नेपाल रेखा
धिरेन्द्रकुमार चौधरी बराहक्षेत्र । सुनसरीको बराहक्षेत्र नगरपालिका कृषि क्षेत्रले भरिएको छ । यहाँ धान बाली, मकै तोरी बाली कृषकहरूले खेतमा लगाउने प्रमुख बालिको रुपमा रहेको छ । यस बाहेक यहाँ खाद्यान्नका लागि बिभिन्न बाली लगाउने गरिएको छ । यहाँका कृषकहरूको आम्दानीको श्रोत पशुपालन रहेको छ । यस क्षेत्रमा गाई, बाख्रा पालन कृषकहरूले गर्दै आएका छन् । बराहक्षेत्र नगरपालिका कार्यालय कृषि शाखाकी कर्मचारी शकुन्तला पौडेलका अनुसार ५० प्रतिशत अनुदान रकममा यहाँका कृषकलाई पावर टिलर ३८, मिनि पावर टिलर ४१, धान काट्ने मेसिन १९ थान र मकै छोडाउने मेशिन ३१ थान वितरण गरिएको छ । यहाँका कृषक समूह र सहकारी संस्थामा वितरण गरिएको बताइएको छ । बराहक्षेत्र निवासी इन्दिरा भट्टराईले ५० प्रतिशत अनुदान रकममा मकै छोडाउने मेशिन पाएको बताइन् । उनले बिगतदेखि दुई बिगाहा जग्गामा मकै खेती गर्दै आएकोमा मेशिन पाएपछि मकै छोडाउन सजिलो हुने धारणा राखिन् । बराहक्षेत्र नगरपालिकाले आर्थिक बर्ष २०७८।०७९ को कार्यक्रम अनुसार किसानलाई कृषि औजार वितरण गरिएको जनाएको छ । बराहक्षेत्र नगरपालिकाका नगरप्रमुख रमेश कार्कीले कृषि क्षेत्रमा बिकास गर्नका लागि कृषि औजार वितरण गरिएको बताए । उनले कृषि औजार खरिदको लागत रकम पौने चार करोड रुपैया रहेको जानकारी दिए ।
