इटहरी । इटहरी मुख्य चोकमा जडान गरिएको ट्राफिक लाइटको प्रदेश नम्बर १ का मुख्यमन्त्री राजेन्द्र राईले उद्घाटन गरेका छन् । प्रदेश सरकारको वित्तीय सहयोग र इटहरी उपमहानगरपालिकाको समन्वयमा १ नम्बर प्रदेशमै पहिलो पटक इटहरीको मुख्य चोकमा जडान गरिएको ट्राफिक लाइटको उद्घाटन गरिएको हो ।
ट्राफिक लाइट उद्घाटन कार्यक्रममा बोल्दै प्रदेश १ का यातायात व्यवस्था तथा संचारमन्त्री उपेन्द्र घिमिरेले प्रदेश १ का अन्य ठुला सहरहरुमा पनि ट्राफिक लाइट स्थापना गर्ने गरी योजना बनाइएको बताएका छन् । उनले निजी क्षेत्रसँग समन्वय गरी शशुल्क सवारी साधन पार्किङलाई प्राथमिकतामा राखी अगाडी बढ्ने जानकारी दिए ।
अर्को शीर्षकको बजेटलाई इटहरीको ट्राफिक लाइट जडानकोलागि विनियोजन गरिएको बताउँदै कार्यक्रमका प्रमुख अतिथिसमेत रहेका प्रदेश १ का मुख्यमन्त्री राजेन्द्र राईले गुरु योजना बनाएर प्रदेश सरकार अघि बढिरहेको जानकारी दिए । साथै उनले इटहरी चौकमा निर्माण गरिने भनिएको आकाशे पुल निर्माण यही आर्थिक वर्षमा सम्पन्न गरिने विश्वास व्यक्त गरे ।
इटहरी नगर प्रमुख हेमकर्ण पौडेलको अध्यक्षतामा सम्पन्न कार्यक्रममा बिभिन्न सुरक्षा निकायका पदाधिकारी,सुनसरीका प्रमुख जिल्ला अधिकारी इन्द्रदेव यादव, इटहरी नगर उपप्रमुख संगीता चौधरी लगायतका अतिथिहरुको सहभागिता रहेको थियो ।
