दीपक कार्की
इटहरी । प्रदेश सभाको समयावधि सकिन पाँच महिना मात्र बांकी रहेको समयमा १ नम्बर प्रदेश सभाले प्रदेशको नाम नै नराखी यो अवधी सकिने आशंका बढिरहेको छ । मुलुक संघीयतामा गएसंगै ७ वटा प्रदेशमा विभाजन गरिएकोमा ६ वटा प्रदेशले नाम राखिसकेका छन् भने १ नम्बर प्रदेशले भने हालसम्म नाम जुराउन सकेको छैन । प्रदेश सभाको समयावधि सकिन लागेको समयमा नामकै लागि प्रदेश सभाको बैठक राख्ने तयारी भइरहेको छ । तर, सत्तामा रहेका गठवन्धनका दलहरु विचमै नामका विषयमा सहमति जुट्न सकेको छैन ।
संघीयता पछिको पहिलो प्रदेश सभाको समय सकिन थोरै महिना मात्र बांकी रहेको समयमा १ नम्बर प्रदेश सभाले हालसम्म नाम नै राख्न सकेको छैन । नामका विषयमा दलहरुविच सहमति जुट्न नसक्दा प्रदेशको नामका विषयको अन्यौल कायमै रहेको छ ।
सरकारमा रहेको सबैभन्दा ठुलो दल नेपाली काँग्रेसले सप्तकोसी नाम प्रस्ताव गरेको छ । सरकारको नेतृत्व गरेका मुख्य मन्त्री राजेन्द्र राई भने पहिचानको विकल्पमा आफू नभएको अझै दाबी गरिरहेका छन् । सुनसरीको इटहरीमा आयोजित एक प्रदेश एक सांस्कृतिक कार्यक्रमको समापनका प्रमुख अतिथिसमेत रहेका राईले आफू किराँतको पक्षमा अझै अडिग रहेको बताएका हुन् । उनले आफुहरुले मान्दै आएको देवीदेवताको कसम खादै मुख्य मन्त्री, दल त्याग्नु परेपनि आफु त्याग्न तयार रहेको तर नामका सवालमा पहिचानकै पक्षमा रहेको स्पष्ट पारेका हुन् ।
संघीय सरकारको आर्थिक सहयोग तथा १ नम्बर प्रदेश पर्यटन तथा संस्कृति मन्त्रालयको आयोजना तथा किराँत समुदायसंग आवद्ध राई लिम्बू, याख्या र सुनार जातिको संयुक्त संयोजन रहेको कार्यक्रमको समापन समारोहलाई मुख्य मन्त्री राई सम्बोधन गरेका थिए । दुई दिनसम्म चलेको सो कार्यक्रमा किराँत समुदायका बिभिन्न पक्षका विषयमा डा.तारामणी राई, प्रेम एक्तेन लगायतले कार्यपत्र प्रस्तुत गरेका थिए । दोस्रो दिन जातिय झाँकी, भेषभुषा र खानाको प्रदर्शनी सहित कार्यक्रम समापन गरियो ।
