विराटनगर । स्थानीय तहको निर्वाचनमा विराटनगर महानगरपालिका वडा नम्बर ६ बाट वडा अध्यक्षका लागि उम्मेदवार बनेका जनता समाजवादी पार्टी नेपालका इरसाद अन्सारीले आफनो चरित्र हत्या गरी निर्वाचनमा जनमत घटाउने काम भएको बताएका छन् । उनले लोकतन्त्रमा सबैको सम्मान हुनुपर्ने भन्दै केही व्यक्तिहरुले वडामा आफूलाई हराउन बिभिन्न प्रपन्च रचेको भन्दै त्यसको निन्दा गरेका हुन् ।
उनले विराटनगरमा पत्रकार सम्मेलन गरी आफू यस वडामा चिरपरिचित उम्मेदवार रहेको र जित्ने प्रबल सम्भावना रहेपनि केही उछृङ्खल समूहले गलत प्रचारप्रसार गरी मेरो जित्ने सम्भावनालाई कमजोर बनाउने खेल खेल्ने जो कोही भएपनि कसुरदार हुन् भने । मतदानको दिन मेरो नाममा फर्जि अपील बनाई मतदाता र मतदाताको घरघरमा पर्चा पुर्याउने समूह तपाँई हाम्रै समाजका हुन् यस्ता समूहले आफ्नो पनि हित गर्दैनन् र अरुको पनि हित नगर्ने भएकाले सचेत नागरिक सावधान रहन अन्सारीले आग्रह गरे ।
समाजमा गलत सूचना दिने, भड्काउने र एकआपसबीच बैमनस्यता बढाउने अपराधीलाई कारबाही गर्न प्रहरी प्रशासनलाई अन्सारीले आग्रह गरे । निर्वाचनमा यसरी गलत अफवाह फैलाएर निर्वाचन विरुद्ध षड्यन्त्र रच्दै जालझेल गर्न खोजिएकाले त्यस्ता व्यक्तिलाई तत्काल कार्बाही गर्न उनले प्रशासन समक्ष माग समेत गरेका छन् ।
