इनरुवा । सुनसरी जिल्लाको सदरमुकामसमेत रहेको इनरुवा नगरपालिकाको मेयर र उपमेयर पदमा नेपाली कांग्रेसका उम्मेदवार निर्वाचित भएका छन् ।
नेपाली काँग्रेसका सुनसरी जिल्ला सभापतिसमेत रहेका केदार भण्डारी ११ हजार ८ सय २४ मत ल्याएर मेयरमा निर्वाचित भएका हुन् । उनका निकटतम् प्रतिद्वन्द्वी एमालेतर्फका उम्मेदवार सरोज पोखरेलले ९ हजार ५३ मत प्राप्त गरे । त्यसैगरी, उपमेयरमा पनि नेपाली काँग्रेसकी विनिताकुमारी मेहताले जित हात पारेकी छिन । उनले ११ हजार ४ सय ८० मत ल्याएर जित सुनिश्चित गरेकी हुन् । उनकी निकटतम् प्रतिद्वन्द्वी एमालेतर्फकी उम्मेदवार सहजादी प्रविणले ९ हजार ३ सय ४७ मत प्राप्त गरेकी छन् ।
भण्डारीले २०४६ सालमा अनेरास्ववियूबाट नेविसंघमा प्रवेश गरी विभिन्न पदहरुको जिम्मेवारी सम्हालेका थिए । उनी नेपाली काँग्रेसको सुनसरी जिल्ला सदस्य, दुई कार्यकाल सचिव, डेमोक्रेटिक लयर्स एसोसीएसनको केन्द्रीय उपाध्यक्ष, नेपाल बार एसोसिएसन सुनसरीको अध्यक्ष, पूर्वाञ्चलबाट बारकै केन्द्रीय उपाध्यक्ष समेत भएका थिए । नव निर्वाचित मेयर भण्डारीले कृषि र सिँचाइको समस्या समाधान तथा बाढी नियन्त्रणलाई पहिलो प्राथमिकतामा राखेको बताएका छन् । उनले नगरवासीको हितमा नगरक्षेत्रको जनशक्ति, स्रोत–साधनको अधिकतम् सदुपयोग गर्ने पनि बताए । भ्रष्टाचारमा शून्य सहनशीलता, आर्थिक अभिबृद्धि, सामाजिक अपराध न्यूनीकरणका लागि नगरवासीसँग सहकार्य अघि बढाउने उनको भनाइ छ ।
