इटहरी । अखिल नेपाल महिला संघ (अनेम संघ) सुनसरीले मंगलबार जिल्ला स्तरीय भेला तथा प्रशिक्षण कार्यक्रमको आयोजना गरेको छ ।
सुनसरीको रामधुनी नगरपालिकाको झुम्कामा जिल्लाभरिका अगुवा महिलाहरु सहभागि भएका थिए ।
पुष्पकमल दाहाल (प्रचण्ड) र माधवकुमार नेपाल अध्यक्ष रहेको नेपाल कम्युनिष्ट पार्टी (नेकपा) निकट रहेका महिलाहरुको भेलालाई सो पार्टीका केन्द्रीय नेताहरुले समसामयिक राजनीतिक विषयमा प्रशिक्षण दिएका थिए ।
भेलालाई सम्बोधन गर्दै सो पार्टीको केन्द्रीय सदस्य एवम् महिला फ्याक्सन इन्चार्ज कमला रोकाले प्रधानमन्त्री केपी ओली र राष्ट्रपति विद्यादेवी भण्डारीले प्रतिनिधि सभा विघठन गरेर संविधानमाथि नै हमला गरेको बताइन् । पूर्व मन्त्रीसमेत रहेकी उनले प्रधानमन्त्री र राष्ट्रपतिको अवैधानिक कदमको डटेर सामना गर्न भेलामा उपस्थित महिलाहरुलाई निर्देशनसमेत दिइन् ।
त्यसैगरी, पार्टी केन्द्रीय सदस्य एवम् सोही पार्टीका सुनसरी जिल्ला इन्चार्ज धर्म निरौला, केन्द्रीय सदस्य एवम् सुनसरी सहइन्चार्ज रामकुमारी चौधरी र पार्टी १ नम्बर प्रदेश कमिटि सदस्य यशोदा अधिकारीले अगुवा महिला कार्यकर्ताहरुलाई प्रशिक्षण दिंदै प्रतिनिधिसभा पुनःस्थापनाको आन्दोलनमा जोडदार रुपमा अघि बढ्न निर्देशन दिएका थिए ।
भेलामा सुनसरी महिला विभाग प्रमुख सपना परियार (सन्ध्या) ले १ हजार ५१ सदस्यीय जिल्ला स्तरीय संघर्ष समिति पनि गठन गरेकी थिइन् । त्यसको संयोजकमा पार्टी प्रदेश कमिटि सदस्य निरा आचार्य (खनाल) र सहसंयोजमा पार्टी जिल्ला कमिटि सदस्य एवम् महिला विभाग प्रमुख सपना परियार (सन्ध्या) रहेका छन् ।
कार्यक्रमको सभापतित्व वेनु काफ्लेले गरेकी थिइन् भने स्वागत मन्तव्य रेखा खतिवडाले व्यक्त गरेकी थिइन् । कार्यक्रमको संचालन ज्योति लिम्बूले गरेकी थिइन् ।
