इटहरी । प्राविधिक शिक्षा र तालिमलाई गुणस्तरीय बनाउने उद्देश्यले इटहरीमा छलफल गरिएको छ ।
सुनसरीको इटहरीमा संचालित नरबहादुर कर्माचार्य स्मृति बहुप्राविधिक शिक्षालयको संयोजनमा प्राविधिक क्षेत्रका विज्ञ र नेतृत्वकर्ताहरुसँग शुक्रबार छलफल गरिएको हो । सो छलफलमा प्राविधिक शिक्षाका विज्ञ प्राध्यापक डाक्टर आरबी थापा र नन्दकुमार थापाले गुणस्तरीय प्राविधिक तथा व्यवसायिक शिक्षाबारे कार्यपत्र प्रस्तुत गर्नु भएको थियो । कार्यपत्रमाथि २४ जना प्राविधिक क्षेत्रका विज्ञहरुले सुझावहरु पेश गर्नु भएको थियो । कार्यपत्रमाथिको छलफल पछि प्राविधिक शिक्षालाई व्यवस्थित बनाउन सिटीईभिटीले तयार गरेको आधारभूत मापदण्ड प्राविधिक शिक्षालयहरुले कार्यान्वयन गर्नुपर्ने, प्राविधिक शिक्षालयका प्रमुख र व्यवस्थापन समितिका अध्यक्षहरुबीच छलफल र समन्वय हुनुपर्ने, दक्ष प्रशिक्षकको नियुक्ति गरिनुपर्ने लगायतका सुझावहरु पेश भएका छन् ।
त्यसैगरी, चुस्त एवम् प्रभावकारी व्यवस्थापन, स्थानीय आवश्यकताको पहिचान गरी कार्यक्रम उत्पादन, गुणस्तरीय विद्यार्थी छनौट गर्नुपर्ने सुझावहरु विज्ञहरुले दिनु भएको छ । साथै विद्यार्थीहरुलाई आय आर्जन गर्दै पढ्ने अवसर दिनुपर्ने, साझेदार संस्था र प्रतिष्ठानहरुबीच नियमित समन्वय र सहयोग हुनुपर्ने, पाठ्यक्रम र मूल्यांकन प्रणालीलाई नियमितता दिनुपर्नेलगायत १५ बुँदामा विज्ञहरुले सुझाव दिनु भएको छ । नरबहादुर कर्माचार्य स्मृति प्रतिष्ठान सुनसरीका अध्यक्ष निर्मल बरालले बहुप्राविधिक शिक्षालय प्रमुख तथा व्यवस्थापन समितिहरुको संघ गठन गरी विस्तार गर्न नन्दकुमार थापालाई संयोजकसमेत तोकिएको जानकारी दिनु भयो । थापा सिरहाको गोलबारजमा रहेको जयगोविन्द साह बहुप्राविधिक शिक्षालय व्यवस्थापन समिति अध्यक्षसमेत रहनु भएको छ । छलफलमा रत्नकुमार वान्तवा स्मृति प्रतिष्ठान इलाम, निर्मल लामा स्मृति प्रतिष्ठान बर्दीवास, पुष्प–धिरेन्द्र स्मृति प्रतिष्ठान दमकका प्रतिनिधि तथा संचालकहरुको समेत सहभागिता रहेको थियो ।
सुनसरीको इटहरीमा संचालित नरबहादुर कर्माचार्य स्मृति बहुप्राविधिक शिक्षालयले सिटीइभिटीको सम्बन्धन र साझेदारीमा सिभिल इन्जिनियरिङ्ग, होटल म्यानेजमेन्ट र कृषि, बालि विज्ञानमा ३ बर्षे डिप्लोमाका लागि मंसिर २८ गतेदेखि पढाई अघि बढाउने तयारी गरिरहेको शिक्षालयका प्राचार्य अर्जुन उप्रेतीले बताए ।
