इटहरी । सत्तारुढ दल नेपाल कम्युनिष्ट पार्टी (नेकपा) को केन्द्रीय सचिवालयमा पार्टी एकता र सरकार संचालनबारे विवाद र बहस जारी रहेकै बेला सोही पार्टीको इटहरी उपमहानगर कमिटिको एकताले भने पूर्णता पाएको बताइएको छ ।
नेकपा इटहरी उपमहानगर कमिटि पार्टी सचिव काँशीनाथ दङ्गालले मंगलबार कमिटिको सचिवालय बैठक बसी एकता प्रक्रिया सम्पन्न गरिएको जानकारी दिए । पार्टी सचिव दङ्गालले मातहतका पार्टी कमिटि र सदस्यहरुलाई पार्टी एकता विरोधी गतिविधि नगर्न निर्देशनसमेत बैठकमार्फत दिइएको बताए । साथै पार्टी एकताको पक्षमा दृढतापूर्वक कार्य सम्पन्न गर्न वडा कमिटि तथा शाखा कमिटिहरुलाई निर्देशनसमेत दिइएको दङ्गालको भनाई छ ।
उपमहानगर कमिटिका अध्यक्ष बहादुरसिंह तामाङ्ग (ज्वाला)को अध्यक्षतामा बसेको मंगलबारको सचिवालय बैठकले प्रचार विभाग, स्कूलिङ्ग विभाग, संगठन विभाग, स्थानीय तह समन्वय विभाग लगायतका २७ वटा विभाग र २७ वटै फ्याक्सनसमेत गठन गरेको दङ्गालले जानकारी दिए । बैठकमा पार्टी केन्द्रीय सदस्य एवम् सुनसरी जिल्ला सह–इन्चार्ज निर्मल वराल, पार्टी प्रदेश समिति सदस्य एवम् इटहरी उपमहानगर कमिटि इन्चार्ज केशव विष्ट, इन्चार्ज राजकुमार गिरी, सहइन्चार्ज चिरन्जीवी भट्टराई, प्रदेश कमिटि सदस्य भानु मैनाली लगायतको उपस्थिति रहेको बताइएको छ । दङ्गालका अनुसार थप ४ ३३ जनालाई पार्टीको जिम्मेवारीसमेत प्रदान गरिएको छ ।
