जनक पाण्डे । मोरङ्ग / वडाका चारवटै बिद्यालयलाई आधारभूत तहमा अंग्रजी माध्यमका कक्षा संञ्चालन अनिवार्य गराउन पथरी शनिश्चरे नगरपालिका ५ नं. वडाले काम थालेको छ ।
पछिल्लो समय वडाका सामुदायीक बिद्यालयहरुमा पढाई खस्किएको र गुणस्तरीय नभएको भन्दै जनगुनासो बढेपछि अंग्रेजी माध्यमका बिद्यालयहरुमा अभिभावक तथा बिद्यार्थीहरुको आकर्षण बढिरहेकोबेला वडाका सामुदायीक बिद्यालयहरुमा अंग्रेजी माध्यमको पढाई संञ्चालन गर्न लागिएको हो ।
सामुदायीक बिद्यालयमा प्रतिस्पर्धी र गुणस्तरिय शिक्षा सेवा प्रवाह गर्ने उद्देश्यले ५ नं. वडाका चारवटै बिद्यालयको आधारभूत तहमा अंग्रेजी माध्यमको पढाई संञ्चालन गर्न यसको तयारी थालिएको पथरी–शनिश्चरे नगरपालिका ५ नं. वडा अध्यक्ष जोगबहादुर धिमालले बताउनु भएको छ ।
कक्षा ३ सम्म अंग्रेजी माध्यमको पढाई संञ्चालन गराउन निजी स्रोत शिक्षक परिचालनका लागि वडाका चारवटै बिद्यालय श्री अमरसिंह माबि., श्री सुगाहाट माबि., श्री सहिद रामलक्ष्मण आधारभूत बिद्यालय र श्री जनता आधारभूत बिद्यालयले सहयोग रकम पाउने भएका छन् । प्रत्येक बिद्यालयलाई दुइ लाखका दरले चारवटै बिद्यालयहरुलाई जम्मा आठ लाख रुपैंया शैक्षिक सुधारका लागि चालु बजेटबाट छुट्याएको पनि वडा अध्यक्ष धिमालले बताउनु भएको छ ।
यसैबिच नगरमा आफ्नो वडाका सामूदायीक बिद्यालयहरुमा शैक्षिक गुणस्तरमा कमि हुनुमा वडा प्रतिनिधीहरु, अभिभावक, बिधार्थी एवं शिक्षक सवैको कमिकजोरी रहेको बताउँदै पथरी शनिश्चरे नगरपालिका ५ नं. वडा सदस्य चेतेन्द्र खड्काले भन्नुभयो– “बालबालिकाको भविश्य निर्माणमा अभिभावक लगायत हामी सवै एकजुट हुन आवश्यक छ ।” अभिभावक दिवसमा बिद्यालयमा उपस्थित भएर आफ्ना बिद्यार्थी र बिद्यालयको प्रगति बिवरण र समस्याहरु बारे छलफल गरेर सुझाव सल्लाह दिन पनि वडा सदस्य चेतेन्द्र खड्काले अभिभावक तथा वडाबासीहरु संग आग्रह गर्नुभएको छ ।
चालु आव.मा पथरी शनिश्चरे नगरपालिका ५ नं. वडाले शैक्षिक सुधारका कार्यक्रम संगै स्वास्थ्य कृषि र खानेपानीलाई प्राथमिकतामा राखेर वडाका योजनाहरु अघि बढाएको छ । साथै पूर्वाधार बिकाश निर्माण तथा लक्षित समुदाय कार्यक्रममा ध्यान दिएको वडामा चालु आवमा पचहत्तर लाखको बजेट योजना रहेको छ ।
वडा अध्यक्ष जोगबहादुर धिमालका अनुुसार स्वास्थ्य तर्फ ल्याव परिक्षणमा सहजीकरण गर्न दुई जना ल्याव टेक्निसियनको नियूक्तिको योजना रहेको र सेवा सर्वसुलभ र प्रभावकारी बनाउदै लगिने जनाईएको छ ।
कृषिमा राहत र प्रवर्धनका लागि पाँच लाख रुपैंया छुट्याईएको छ । किटनाशक औसधी छिट्ने ट्याङ्की खरिद गर्ने योजना संगै सवै कृषकहरु लाभान्वित हुनेगरी छलफल र समन्वय बाट कृषिमा आवश्यकता अनुसार बस्तु तथा सेवा प्रवाह गरिने बताईएको छ ।
त्यस्तै चालु आवमा लक्षित समुदाय कार्यक्रममा ६९ घर परिवारलाई जस्ता पाताले घर छाउने गरि प्रति परिवार पचास हजार रुपैंयाको दरले जम्मा चौतिस लाख ५० हजार रुपैंया छुट्याईएको छ ।
त्यसैगरेर शडक निर्माण र पूर्वाधारमा वडाका भित्रि वाटो निर्माण तथा स्तरोन्नति का लागि बिभिन्न बाटोहरु लाई पचास हजार का दरले दश लाख ५० हजार छुट्याईएको वडा अध्यक्ष धिमालले जानकारी गराउनु भएको छ ।
त्यस्तै वडामा खानेपानी योजनामा समेत कार्य भईरहेको छ । दुइ लाख ५० हजार लिटरको पानी ट्याङ्की निर्माण, एक करोड लगानीमा कम्पाउण्ड वाल (पर्खाल) र चालिस लाख लागतमा बोरिङ्ग को योजना निर्माणाधिन रहेको बताईएको छ । खानेपानी मन्त्रालय मार्फत पथरी शनिश्चरे नगरपालिकाको समन्वय र उपभोक्ता समिति हसन्दहको रेखदेखमा योजना चलिरहेको स्थानिय समाजसेवी उपेन्द्र थापाले बताउनु भएको छ ।
