जनक पाण्डे/इटहरी । न्याय परिषदको वुधवारको बैठकले जिल्ला अदालतका १ सय १४ जना माननिय न्यायाधीशहरुको सरुवा सिफारिस गरेको छ ।
परिषदले २९ जना माननिय जिल्ला न्यायाधीशको नयाँ नियुक्ती सहित पदस्थापन सिफारिस पनि गरेको छ । न्याय परिषदको असोज २१ गतेको बैठकले जिल्ला न्यायाधिशहरुको सरुवा सिफारिस र पदस्थापन सिफारिस गरेको हो ।
पदस्थापन सिफारिस भएका मध्ये झापा, मोरङ र सुनसरीमा चार जना न्यायाधीश नयाँ नियुक्ती भइ आएका छन् । सरुवा तथा पदस्थापन भइ आएका न्यायाधीशहरुमा झापामा चार, मोरङ्ग र सुनसरीमा सात÷सात जना सरुवा भएर आउन लागेका हुन् । झापामा दिलकुमार बर्देवा, मोरङ्गमा रोशनकुमार भट्टराई, सुनसरीमा निर्मला योङ्या र रामचन्द्र खड्का पदस्थापन नयाँ नियूक्ति लिएर आउनेछन् ।
सरुवा भइ जानेमा सुनसरी जिल्ला अदालतबाट न्यायाधिसहरुः धर्मराज पौडेल, ईन्द्रकुमार चोङ्टल्ली, शंकरबहादुर राई, खिमानन्द भूषाल, ध्रुवकुमार उप्रेती र मणिराम न्यौपाने सहित ६ जना रहेका छन् । त्यसैगरि सुनसरी जिल्ला अदालतमा सरुवा तथा पदस्थापन भइ आउने न्यायाधिसहरुमा कैलाशप्रसाद सुवेदी, कमलप्रसाद पोखरेल, सुभासवाबु पुरी, हेमबहादुर सेन, टिकेन्द्र दाहाल, रामचन्द्र खड्का र निर्मला योङ्या रहेका छन् । रामचन्द्र खड्का र निर्मला योङया नयाँ नियुक्ति हुन् । सुनसरीका कानून व्यवसायीहरु निर्मला योङ्यलाई सुनसरीमा पहिलो महिला न्यायाधीश रहने बताउँछन् ।
यो निर्णय संगै झापा, मोरङ्ग र सुनसरीका जिल्ला अदालतहरुमा नयाँ न्यायाधीशहरुले आफ्नो कार्याभार सम्हाल्ने छन् । सामान्यतया जिल्ला अदालत र उच्च अदालतमा न्यायाधिसको कार्यावधि दुई बर्ष सम्म रहने प्रावधान रहेको छ । सुनसरीमा १० जना न्यायाधीशको दरबन्दी रहेकोमा ९ जनाको दरबन्दी पूर्ति भएको छ । सुनसरीमा हालसम्म ८ जना न्यायाधीशहरु कार्यरत रहेका थिए ।
