इटहरी । मेडिकल ल्याबेरोटरी एसोसिएसन अफ नेपाल (मेलान) सुनसरी र प्रदेश स्वास्थ्य प्रयोगशालामा कार्यरत स्वास्थ्यकर्मीको सहकार्यमा १५ हजार ५ सय बराबरको खाद्य सामाग्री सोमबार सहयोग स्वरुप प्रदान गरिएको छ ।
इटहरी स्थित सरकारी अस्पतालको प्रयोगशाला बिभागमा स्वयम् सेवकको रुपमा कार्यरत एक स्वास्थ्यकर्मीलाई सो सहयोग वितरण गरिएको हो । उनी र उनको ८ जना परिवारलाई कोरोना पोजेटिभ देखिएको थियो । उनीहरु सबै आइशोलेसनमा बसेर सामान्य अवस्थामा आइसकेका छन् ।
परिवार नै संक्रमित भएपछि उनीहरुलाई पौष्टिक खाद्य सामाग्री उपलब्ध गराइएको मेलान सुनसरी अध्यक्ष डा. खगेन्द्र ओलीले जानकारी दिए । डा. ओलीले लकडाउनकाकारण संकटमा परेकाहरुलाई मेलानले थप सहयोग गर्दै जाने बताए । सहयोग हस्तान्तरणका क्रममा मेलान प्रदेश अध्यक्ष नबीन खड्का र केन्द्रीय समिति सल्लाहाकार प्रकाश अधिकारीको पनि उपस्थिति रहेको थियो । साथै मेलानका अन्य सक्रिय सदस्यहरुको पनि उपस्थिति रहेको थियो । ल्याब असिस्टेन्टमा कार्यरत उनको परिवारले सानोतिनो पसल पनि संचालन गर्दै आएको थियो । लकडाउन र कोरोना प्रभावले सो पसल पनि हाल बन्द अवस्थामा छ ।
