काठमाडौं । नेपाल कम्युनिष्ट पार्टी (नेकपा) केन्द्रीय सदस्य एवम् संसद रामकुमारी चौधरीले बढ्दो महिला हिंसा न्यूनीकरण गर्न सरकारको ध्यानाकर्षण गराउनु भएको छ ।
उहाँले लकडाउन अवधिमा महिला हिंसा बढेको तथा क्वारेन्टाइनमा बसेका महिलाहरु असुरक्षित भएको भन्दै सरकारको ध्यानाकर्षण गराउनु भएको हो ।
पछिल्लो रिपोर्ट अनुसार मुलुकभर ३ सय ७३ बलात्कारका घटना भएका छन् । त्यसैगरी, बहुविवाह ३४, बालविवाह ९, मानव बेचबिखन ९, बोक्सी आरोपमा ८ र अप्राकृतिक मैथुन ७ घटना भएका छन् । यी घटनाको रिपोर्ट प्रतिनिधिसभा बैठकमा जानकारी गराउदै उहाँले भन्नु भयो–‘घटनाबाट पीडित महिला तथा बालबालिकालाई राज्यले सुरक्षा प्रदान गरी न्याय दिनु पर्छ ।’
नेपाल प्रहरीका अनुसार ११ चैत्र देखी ३२ जेठ सम्म देशभर महिला हिंसासँग सम्बन्धित पाँच सय ४० घटना भएका छन् । ‘यी घटना घट्नुमा दण्डहिनता मौलाउनु हो’ उहाँले भन्नु भयो । उहाँले अगाडि भन्नु भयो–‘कानुन कडा भए पनि कार्यान्वयनको पक्ष फितलो हुदा महिला हिंसाका घटना न्यूनीकरण नभएको हो ।’ महिला हिंसाका घटनाहरु न्यूनीकरण गर्न सरकार गम्भीर हुनु पर्ने कुरामा सांसद चौधरीले जोड दिनु भयो ।
