दीपक कार्की
विराटचौक । पहाडी क्षेत्रमा पाइने सिस्नु अर्थात अल्लोको कपडा तयार पार्ने पूर्वी तराईमा रहेको एक मात्र घरेलु उद्योग लकडाउनका कारण मारमा परेको सञ्चालकले गुनासो गर्नु भएको छ ।
लकडाउनका कारण बजारमा उत्पादन पुर्याउन नसकेको तथा कच्चा पदार्थ ल्याउन नपाएको कारण मारमा परेको लुमा घरेलु अल्लो कपडा उद्योगकी सञ्चालिका सिता राईले गुनासो गर्नु भएको हो ।
मोरङको सुन्दरहरैंचा नगरपालिका–१२ मा २०७१ साल देखि सञ्चालनमा आएको लुमा घरेलु अल्लो कपडा उद्योग तथा ट्रेनिङ्ग सेन्टरको लागि कच्चा पद्धार्थ ताप्लेजुङ्ग, संखुवासभा देखि ल्याउने गरेका सञ्चालिका राईले बताइन् । कच्चा पदार्थ पहाडी जिल्ला देखि ल्याएर तयार बनाइने कपडा स्थानीय बजारका साथै काडमाडौं, दार्जेलिङ्ग, हङकङसम्म बिक्रीका लागि पठाउने गरेकोमा लकडाउनका कारण बजार पाउन नसकेको राईले गुनासो गर्नु भयो ।
मिहिनेत अनुसार आम्दानी नहुने तथा उपभोक्ताहरुले समेत स्वदेशी उत्पादन भन्दा विदेशी कपडाहरु मन पराउने हुनाले आफुहरुले आम्दानी लिन नसकेको सञ्चालकको गुनासो रहेको छ । अल्लोका कपडाका साथै ढाका कपडा समेत उत्पादन गर्ने सो उद्योगकी सञ्चालिकाले तालिमका साथै महिलाहरुलाई रोजगारी समेत दिदै आएकी छन् । उद्योगमा तालिम लिएर रोजगारी गर्दै पाएकी फुलमाया तामाङ्ग आर्थिक उपार्जनमा सहयोग पुगेको बताउनु हुन्छ । स्वदेश तथा विदेशमा समेत माग हुने यस प्रकारका उद्योगहरुको विकास र विस्तारका लागि सरकारी स्तरबाट सहयोग भए आफुहरु उत्पादन बढाउन सक्ने सञ्चालक राई बताउनु हुन्छ ।
