इटहरी । इटहरी उपमहानगरले ७५ जना कृषकलाई कोरली गाई वितरण गरेको छ ।
गाईपालन जोनका रुपमा निर्धारित १, २ र २० नम्वर वडाका ७५ जना कृषकलाई कोरली गाई वितरण गरिएको हो । शनिबार इटहरी–२ का २५ जना कृषकलाई उपमहानगर प्रमुख द्वारिकलाल चौधरी र उपप्रमुख लक्ष्मी गौतमले कोरली गाई वितरण गर्नु भयो ।
यसअघि नै अन्य दुई वडाका पचास जना कृषकलाई गाई वितरण गरिसकिएको छ । इटहरीलाई कृषिमा आत्मनिर्भर बनाउने अभियान अन्तर्गत कोरली गाई वितरण गरिएको प्रमुख चौधरीले बताउनु भयो । कोरली गाई वितरण गरिएका ७५ जना कृषकलाई गाईपालक कृषक बनाउने र यो अभियानलाई निरन्तरता दिएर इटहरीलाई दुधमा आत्मनिर्भर बनाउने उपमेयर गौतमले बताउनु भयो । विपन्न कृषकले कोरली गाई पाएपछि खुशी ब्यक्त गरेका छन् । इटहरी–२ की यशोदा दाहालले भनिन्–“किन्न सक्ने अवस्था थिएन उपमहानगरले कोरली गाई प्रदान गरेको छ खुशी लागेको छ उपमहानगरलाई धेरै धेरै धन्यवाद दिन चाहन्छु ।” इटहरी–२ की अनिलकुमारी राईले उपमहानगरले प्रदान गरेको गाईपालन गरेर आय–आर्जन गर्न सकिने आशा पलाएको बताइन् ।
