इटहरी । क्वीक रेस्क्यु टिम नेपालले कोरोना संक्रमण नफैलियोस् भनेर स्वास्थ्य सुरक्षाका लागि सुरक्षाकर्मी तथा अत्यावश्यक काममा खटिने कर्मचारीहरुका लागि पिपिई लगायतका सामाग्रीहरु उपलव्ध गराउन थालेको छ ।
विश्वव्यापी रुपमा फैलिरहेको कोरोनाको जोखिमको समयमा समेत कार्य क्षेत्रमा खटिने कर्मचारी र सुरक्षाकर्मीहरुलाई क्वीक रेस्क्यु टिम नेपालले पिपिई र मास्क लगायतका स्वास्थ्य सुरक्षा सामाग्रीहरु उपलव्ध गराउने कार्य थालेको हो ।
कर्मचारी तथा सुरक्षाकर्मीहरु समेत कार्य क्षेत्रमा खटिदा जोखिममा पर्ने तर्फ मध्यनजर गर्दै पहिलो चरणमा जिल्ला प्रशासन कार्यालय सुनसरीलाई पाँच थान पिपिई, इलाका प्रहरी कार्यालय इटहरीलाई २५÷२५ थान एन ९५ मास्क र ग्लोब वितरण गरेको टिमका अध्यक्ष विक्रम वर्णवासले जानकारी दिनु भएको छ । उहाँले विश्वमा फैलिरहेको कोरोना कोभिड–१९ को प्रभाव सुनसरीमा समेत परेको अवस्थामा स्वास्थ्य सुरक्षाका लागि स्वास्थ्य सुरक्षा सामाग्रीहरु वितरण गर्न थालेको बताउनु भयो । अरु पनि थप गरेर वितरण गर्ने योजना समेत बनाएको उहाँले जानकारी दिनु भयो ।
विपदका समयमा उद्धार तथा राहत वितरण जस्ता सामाजिक कार्य गर्दै आएको क्वीक रेस्क्यु टिमले लकडाउनका कारण दैनिक जीविका चलाउन समस्या पर्दै आएका इटहरी क्षेत्रका १६ परिवारलाई प्रति परिवार २ हजारका दरले ग्याँस र तरकारीका लागि भनेर सहयोग समेत गरेको जनाइएको छ । यस अघि पनि क्वीक रेस्क्यु टिमले विभिन्न ठाउँमा लकडाउनका कारण दैनिक काममा जान नपाएर समस्या झेल्दै आएका विपन्न वर्गका मानिसहरुलाई खाद्यान्न लगायतको राहत वितरण गर्दै आएको छ ।
