इटहरी । सुनसरीको इटहरीमा यही चैत २२ गतेदेखि ‘छैठौं संस्करणको अन्तर्राष्ट्रिय आमन्त्रण इटहरी भेट्रान गोल्डकप फुटबल प्रतियोगिता’ आयोजना हुने भएको छ । प्रतियोगिता चैत २८ गतेसम्म सञ्चालन हुने आयोजकले जानकारी दिएको छ ।
हाम्रो इटहरी भेट्रान क्लबको आयोजनामा हुन लागेको उक्त प्रतियोगिताको विजेताले नगद १ लाख १ हजार पुरस्कार प्राप्त गर्नेछ भने उपविजेताले ५१ हजार नगद पुरस्कार पाउनेछ । प्रतियोगिताको मुख्य उद्देश्य पुराना खेलाडीहरूलाई पुनः खेलमा सक्रिय बनाउनुका साथै नयाँ खेलाडी उत्पादन र खेल प्रशिक्षक (कोच) तयार पार्नु रहेको आयोजकले जनाएको छ ।
हाम्रो इटहरी भेट्रान क्लबका अध्यक्ष राम शरण चौधरीको सभापतित्वमा बिहीबार आयोजित पत्रकार सम्मेलनमा क्लबका प्रतिनिधि सुनिल तामाङका अनुसार प्रतियोगितामा नेपाल र भारतका गरी आठ टोलीको सहभागिता रहनेछ । भारतको सिक्किमस्थित बम्रिक नामफिङ क्लब सहभागी हुने छ भने नेपालतर्फ आयोजक इटहरीसहित धरान भेट्रान, हाम्रो धरान, पथरी भेट्रान, एभरेष्ट भेट्रान, विराटनगर भेट्रान र दमक भेट्रान क्लब सहभागी हुनेछन् ।
प्रतियोगिताअन्तर्गत प्रत्येक खेलमा ‘म्यान अफ द म्याच’ घोषित खेलाडीलाई १ हजार ५०० प्रदान गरिनेछ । साथै सर्वोत्कृष्ट खेलाडी, उत्कृष्ट गोलरक्षक, उत्कृष्ट डिफेन्डर, उत्कृष्ट मिडफिल्डर, उत्कृष्ट स्ट्राइकर तथा सर्वाधिक गोलकर्ता खेलाडीलाई जनही २ हजार ५०० पुरस्कार प्रदान गरिने क्लबका दिवस राईले जानकारी दिए ।
प्रतियोगिता सञ्चालनका लागि करिब १५ लाख खर्च हुने अनुमान गरिएको छ । इटहरी उपमहानगरपालिकाले ४ लाख सहयोग गर्ने जनाएको छ भने अन्य वडाहरुबाट सहयोगको अपेक्षा गरिएकोछ ।
