इटहरी । सुनसरीको तरहरास्थित कृषि अनुसन्धान निर्देशनालयको सभाहलमा ‘पशुपालन असल अभ्यास प्रमाणीकरणसम्बन्धी प्रादेशिक अन्तरक्रिया कार्यक्रम’ शुक्रबार सम्पन्न भएको छ ।
राष्ट्रिय पशुपन्छी स्रोत व्यवस्थापन तथा प्रवद्र्धन कार्यालय, हरिहर भवनको आयोजनामा गरिएको कार्यक्रममा संघ, प्रदेश र स्थानीय तहका प्राविधिक तथा कोशी प्रदेशका अगुवा वंगुरपालक कृषकको उल्लेखनीय उपस्थिति रहेको थियो ।
अन्तरक्रिया कार्यक्रम कार्यालयका प्रमुख डा. चन्द्र ढकालको अध्यक्षतामा तथा पथरी शनिश्चरे नगरपालिकाका नगर प्रमुख मोहनप्रसाद तुम्वापोको प्रमुख आतिथ्यता रहेको थियो । कार्यक्रममा डा.आभास पौडेलले असल पशुपालन अभ्यास तथा प्रमाणीकरण प्रक्रियाबारे विस्तृत प्रस्तुतीकरण दिएका थिए ।
कार्यक्रममा वक्ताहरुले पशु स्वास्थ्य व्यवस्थापन, उचित पालन–पोषण, मानव तथा पशुको कल्याण, फार्म अभिलेखिकरण, दुध तथा मासु उत्पादनका पूर्वतयारीदेखि वैज्ञानिक व्यवस्थापनसम्मका मापदण्डहरू पालना गरे पशुजन्य उत्पादन स्वच्छ, विश्वसनीय र निर्यातयोग्य बन्नेमा जोड दिए ।
कार्यक्रममा निर्देशिकाअनुसार आवश्यक मापदण्ड पूरा गरेका कृषकलाई प्राविधिक परीक्षणपछि प्रमाणपत्र प्रदान गरिने व्यवस्था रहेको जानकारी पनि दिइयो ।
कृषि तथा पशुपन्छी विकास मन्त्रालयले २०७८–१०–१६ मा मन्त्रीस्तरबाट स्वीकृत गरेको ‘असल पशुपालन अभ्यास निर्देशिका’ अझै प्रभावकारी रूपमा कार्यान्वयनमा नआएको विषय पनि कार्यक्रममा छलफलको भयो ।
संघीय संरचनामा प्रवेश गरेको लामो समय बितिसक्दा पनि तीन तहका सरकारबीच आवश्यक समन्वय नहुँदा निर्देशिका व्यवहारमा लागू नहुनु कृषकका लागि प्रमुख चुनौती रहेको सहभागीहरूले बताए ।
अन्तरक्रिया कार्यक्रममा सहभागी वंगुरपालक कृषकहरूले वर्षौंदेखि वंगुरपालन गर्दै आएका कृषकका कृषि क्षेत्रमा पर्ने जग्गा स्थानीय तहले अन्य प्रयोजनमा वर्गीकृत गर्दा व्यवसाय नै विस्थापित हुने अवस्था बनेको गुनासो गरे ।
चीन, भियतनामलगायत देशमा बंगुरको मासु निर्यात गर्ने सम्भावना वा भित्री बजारमै गुणस्तरीय मासु आपूर्ति गर्ने उद्देश्य तीन तह सरकारी समन्वय नहुँदा प्रभावकारी नबनेको उनीहरुको भनाइछ ।
साथै कृषकहरुले बजारमा उपलब्ध दानाको गुणस्तरअनुसार नियमन र मापदण्ड आवश्यक रहेको बताए ।
रोग–महामारीले प्रभावित वंगुर व्यवसायीलाई सहुलियतपूर्ण कर्जा, पुँजी विकासका कार्यक्रम, जैविक सुरक्षा पूर्वाधार र व्यवसाय प्रवद्र्धनमा राज्यले विशेष ध्यान दिनुपर्ने सुझाव किसानहरुको छ ।
