पकली । सुनसरीको पकली इलाका प्रहरी कार्यालय पुनर्निर्माण तथा संरक्षण समितिले शनिबार एक कार्यक्रमको बीचमा आफ्नो आय–व्यय सार्वजनिक गरेको छ ।
कार्यक्रममा समितिका अध्यक्ष ज्ञानबहादुर बस्नेतले आपतकालीन अवस्थामा प्रहरी र समुदायबीच सहकार्य आवश्यक हुने बताए । उनका अनुसार, भदौ २४ गते भएको आगलागीमा प्रहरी कार्यालय क्षतिग्रस्त भएपछि सुरक्षाको आवश्यकता महसुस गर्दै समितिले पुनर्निर्माण कार्य सुरु गरेको थियो । उनले गाउँका बासिन्दा र संस्थाहरूले स्वेच्छिक रूपमा सहयोग गरेको जानकारी दिए ।
समितिले कुल ९८५ घरधुरीका बासिन्दा र १३ वटा संस्थाबाट सहयोग संकलन गरेको छ ।
कोषाध्यक्ष भीम लुइँटेलका अनुसार समितिले हालसम्म १३ लाख ९३ हजार ४२४ रुपैयाँ संकलन गरेको र १३ लाख ९८ हजार ८७ रुपैयाँ खर्च भएको छ । बाँकी रकम समितिले आफैं मिलाउने निर्णय गरिएको उनले बताए । उनले नगदबाहेक जिन्सी सामग्री पनि प्रहरी कार्यालयलाई हस्तान्तरण गरिएको जानकारी दिए ।
कार्यक्रममा प्रहरी निरीक्षक लेखनाथ दाहालले प्रहरी र समुदाय सँगसँगै अघि बढ्नुपर्ने बताए । बिरेन्द्र राई र तेजबहादुर परीयार लगायतले पनि आफ्नो विचार राखेका थिए ।
