इटहरी । सुनसरीको इटहरीस्थित निःसाहय बालबालिका सेवा आश्रममा मोरङ बेलबारीका ९३ वर्षीय ज्येष्ठ नागरिक डिल्लीबहादुर थापाले आफ्नो जन्मदिन विशेष ढङ्गले मनाएका छन् ।
पूर्व प्रधानपञ्च समेत रहिसकेका समाजसेवी थापाले आफ्नो ९३ औं जन्मोत्सवको अवसरमा आश्रममा रहेका बालबालिकासँग खुसी बाँडेका हुन् । उनले बालबालिकालाई खानेकुरा वितरण गर्नुका साथै आश्रम सञ्चालनका लागि केही नगद सहयोग पनि प्रदान गरे ।
थापा आफ्नो छोरा हेमराज थापा र बुहारी एलिजा थापासहित आश्रम पुगेका थिए । सो अवसरमा उनले आश्रमकी सञ्चालिका गीता गौतमलाई सहयोग रकम हस्तान्तरण गरे ।
थापाले जन्मदिनमा फजुल खर्च गर्नुको सट्टा निःसाहय बालबालिकासँग खुसी बाँडेर मनाउँदा मनमा सन्तोष मिल्ने अनुभूति भएको बताए ।
कार्यक्रममा समाजसेवी नवराज पोखरेल, केसु विरहीलगायतको सहभागिता रहेको थियो ।
