धिरेन्द्र कुमार चौधरी
रामधुनी । सुनसरीको रामधुनी नगरपालिका–९ मर्चैया गाउँका केही स्थानीयवासी सडक सुरक्षाप्रति बेपरवाह बन्दै आएका छन् । उनीहरूले सडककै छेउमा गाई–भैंसी बाँध्ने, घरायसी सामान राख्ने जस्ता कार्य गरी सडकलाई अवरुद्ध बनाउँदै आएका छन् ।
स्थानीय सवारी चालकहरूका अनुसार गाउँका करिब ८ देखि १० घरधुरीले नियमित रूपमा सडककै छेउमा गाई–भैंसी बाँध्ने गर्छन् । यसले गर्दा बाटो फोहोर हुने, दुर्गन्ध फैलिने र सवारी साधन चलाउँदा ठक्कर वा दुर्घटनाको जोखिम बढेको उनीहरूको गुनासो छ ।
रामधुनी नगरपालिकाको यो क्षेत्र करिब ५० फिट चौडा मुख्य बाटो भएको र यहाँ थारु समुदायका करिब तीन सय परिवार, दिनाभद्री समुदायका सय परिवारसहित ब्राह्मण, क्षेत्री, मधेसी लगायतका समुदायको बसोबास रहेको छ ।
स्थानीयहरूले सार्वजनिक सडकलाई निजी आँगनझैँ प्रयोग गर्न थालेपछि सडकको सौन्दर्य मात्र होइन, सुरक्षासमेत खतरामा परेको हो । सम्बन्धित निकायले समयमै ध्यान नदिए यसले ठूलो दुर्घटनाको रूप लिन सक्ने भन्दै स्थानीय चालक र सर्वसाधारणले सडक सुरक्षाप्रति सबैलाई सचेत रहन आग्रह गरेका छन् ।
