इटहरी । बैक ब्याज बढाइएको तथा दोहोरो कर लगाइएको भन्दै सुनसरीको इटहरीमा व्यवसायीहरुले सरकारको विरोध गरेका छन् ।
इटहरी चेम्बर अफ कमर्शको आयोजनामा व्यवसायीहरुले बैक ब्याज घटाउनु पर्ने दोहोरो कर हटाउनु पर्ने लगायतको माग राखी विरोध प्रदर्शन गरेका हुन् ।
इटहरी उपमहानगरपालिका अगाडि व्यवसायीहरुले ब्याज दर सगरमाथा चढिसक्यो तपाई कता हो गभर्रनर ज्यु भन्ने नारा लगाउदै कालो पट्टी सहित विरोध प्रदर्शन गरे । विरोध प्रदर्शनका क्रममा इटहरी चेम्बर अफ कमर्शका अध्यक्ष गणेश कटुवालले व्यापार व्यवसायमा सहज हुने नीति ल्याउनु पर्नेमा सरकारले व्यापार व्यवसायका लागि समस्या हुने गरी नीति बनाएको आरोप लगाए । उनले पुँजीगत खर्च अध्यावधिक गर्नुको सट्टा ऋण र अनुदानमा मुलुक चलाउदा व्यापारी व्यवसायीहरु दोहोरो कर र ट्याक्सको मारमा परेको गुनासो गरे ।
प्रदर्शनमा सहभागी धनश्याम बरालले बैक व्याजमा छुट भनिएपनि बढेको पाइएको वताउदै यस्तो कार्यको विरोधमा उत्रनु परेको बताए ।
इटहरी चेम्बर अफ कमर्शका पूर्व अध्यक्ष तारा कटुवालले करको दर, व्याजदर बढेको छ, व्यवसायमा लागत बढेको छ भन्दै मुल्यवृद्धि भएकाले त्यसको विरोधमा प्रदर्शनमा उत्रन वाध्य भएको जानकारी गराए ।
इटहरीबाट सुरु भएको व्यापार व्यवसाय विरोध सरकारको नीतिको क्रमिक रुपमा सर्वत्र विरोध हुने विरोध प्रदर्शनमा सहभागीले प्रतिक्रिया दिएका छन् । केही दिन अघि नेपाल सरकारको तर्फबाट अर्थमन्त्री जर्नादन शर्माले प्रस्तुत गरेको बजेट व्यवयासी मैत्री नभएको आरोप प्रदर्शनकारीको रहेको छ ।
